“Bu planların heç biri müharibəni bitirməyəcək, çünki Rusiya və Prezident Putin döyüşləri davam etdirmək istəyir”.
Bu sözləri Globalinfo.az-a açıqlamasında ABŞ Milli Təhlükəsizlik Şurasının Avropa və Avrasiya məsələləri üzrə keçmiş direktoru, sabiq səfir Metyu Brayza deyib.
“Prezident Trampın sülh planı barədə məlumatların mətbuata sızması və ABŞ-ın Ukrayna və Avropalı müttəfiqləri tərəfindən sərt tənqid edilməsindən sonra ona dəyişikliklər edildi. Ötən həftə sonu ABŞ Ukrayna ilə danışıqlarda iştirak edərək və sonra Avropalı müttəfiqlərimizlə bunu əlaqələndirərək 28 maddəlik planı 19 maddəyə endirdi. Və Rusiyanın öncəki plana daxil etdiyi ən çox etiraz doğuran və cəfəng tələblərin çoxu aradan qaldırıldı. Bununla belə, bu planların heç biri müharibəni bitirməyəcək, çünki Rusiya və Prezident Putin döyüşləri davam etdirmək istəyir. O Prezident Trampı müharibəni bitirmək istədiyinə inandırdı, amma o, bunu etmir. Çünki bilir ki, Rusiyanın daha çox əsgəri var və müharibəni çox uzun müddət davam etdirmək ümidi ilə qurbanlar verə bilər. Ukraynanın müharibədən tükənməsinə, sonra isə ABŞ və Avropanın da tükənməsinə və Ukraynaya dəstəyini dayandırmasına səbəb olana qədər bunu davam edə bilər. Ona görə də bu sülh planının müharibəyə son qoyması ehtimalı yoxdur”.
M.Brayza hesab edir ki, Ukrayna təslim olmasa, Rusiyanın müharibədə qalib gəlmək şansı yoxdur:
“Ukrayna heç vaxt təslim olmayacaq. Rusiya üçün müharibədə qalib gəlmək onun ifrat məqsədlərinə, yəni rejimin dəyişməsinə, Ukraynada dəyişikliklər etməyə, Ukraynanın özünü müdafiə qabiliyyətinin aradan qaldırılmasına, onun NATO-ya qoşulmasına imkan verməməyə nail olması deməkdir. Bunların heç biri baş verməyəcək. Buna görə də Rusiyanın öz məqsədlərinə çatacağı halda nə baş verəcəyi barədə düşünmək belə mənasızdır, çünki bu, olmayacaq.
Əgər soruşsanız ki, “müharibə Rusiyanın xeyrinə bitərsə, bunun Azərbaycan üçün hansı nəticələri ola bilər?”, bunu heç kim bilmir. Bu sual Azərbaycandan kənarda heç kimi maraqlandırmır və o qədər spekulyativdir ki, hazırda bilinməyən bir çox amillərə əsaslanır və cavab verməyim dürüst olmazdı, çünki mən sadəcə uydurardım. Bu, real olmazdı. Lakin müharibə Rusiyanın xeyrinə bitməyəcək. Ukraynanın xeyrinə də bitməyə bilər. Ukrayna narazı qalacaq, yəqin ki, ərazisinin bir hissəsini itirdiyini qəbul etməli olacaq. Lakin bu, Rusiyanın xeyrinə olmayacaq, çünki Rusiyanın qazanacağı ərazilər Prezident Putinin artıq bir milyondan çox rus əsgərinin ölümünə səbəb olan müharibədə verdiyi vədlərlə örtüşməyəcək”.
M.Brayza vurğulayıb ki, əgər Rusiya Ukraynaya qarşı müharibədə maksimalist məqsədlərinə çatsa, bunun hər kəs, bütün Avropa, ABŞ və dünyadakı bütün dostlarımız üçün nəticələri çox böyük olardı, çünki Rusiya İkinci Dünya müharibəsindən bəri ilk dəfə olaraq beynəlxalq sərhədləri güc yolu ilə dəyişdirə bilmək kimi dəhşətli yeni bir presedent yaradacaq. O, əminliklə bildirib ki, əgər Rusiya buna nail olsa, Prezident Putin davam edəcək və nəticədə NATO üzvü olan Avropa ölkələrinə hücum etməyə çalışacaq. Beləliklə, bu, üçüncü dünya müharibəsinə səbəb ola bilər.
