Astara rayonu, Qamışovka kənd sakini Əsədullayev İmaməli Rza oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, 1 ildən artıqdırişlə bağlı Məşğulluq Agentliyinə müraciət etsə də, hələ də işsizdir:

“Mən, Əsədullayev İmaməli Rza oğlu, bildirirəm ki, 1 ildən artıqdır işsizəm. Astara Məşğulluq Agentliyindən bildirirlər ki, sənə uyğun iş yeri yoxdur. İşsizlik üçün isə heç bir müavinat verilmir. Bir ildir eyni sözləri təkrar edirlər.

Şikayətçinin redaksiyamıza göndərdiyi video müraciəti olduğu kimi dərc edirik:

Məsələ ilə bağlı Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi ilə əlaqə saxladıq. Agentlikdən bildirdilər ki, Astara rayonu, Qamışovka kənd sakini Əsədullayev İmaməli Rza oğlunun müraciəti araşdırılıb:

“Vətəndaşın istəyi dövlət və ya özəl müəssisələrin birində ofis şəraitli, kompüter işi ilə təmin olunmaqdır. Vətəndaş 2024-cü ilin mart ayından məşğulluq sistemində işsiz kimi qeydiyyata alınıb və ona elə həmin tarixdən başlayaraq 2024- və 2025-ci illərdə “Lənkəran Konserv Zavodu” MMC-da operator işi, “Kredit Evi” ASC-də kredit işçisi, “Bank Olmayan Kredit Təşkilati “International” ASC-də kiçik kredit mütəxəssisi , "AZƏRPOÇT" MMC-də, Mədəniyyət Nazirliyi Yanında Mədəni İrsin Qorunması, İnkişafı Və Bərpası Üzrə Dövlət Xidmətində baş mütəxəssis-abidə mühafizəçisi kimi işlər təklif edilib.

Hazırda vakansiya bankında İmaməli Əsədullayevin istəyinə uyğun münasib iş yeri olmadığından vətəndaşa məşğulluğunun təmin edilməsi üçün digər aktiv məşğulluq tədbirləri barədə məlumat verilib. Lakin İmaməli Əsədullayev işlə təmin olunmaq istədiyini bildirərək digər məşğulluq tədbirlərinə cəlb olunmaqdan imtina edib. Vakansiya bankında münasib iş yeri yaranacağı təqdirdə vətəndaşın işlə təmin olunması istiqamətində müvafiq tədbirlər görüləcək”.