Gürcüstanın keçmiş Prezidenti Mixeil Saakaşvili deyib ki, İvanişvili hökuməti Ermənistan və Azərbaycan arasında normallaşma prosesinə mane olur. Onun sözlərinə görə, Azərbaycan Ermənistan üçün neft məhsullarının mütəmadi tədarükü üçün tarixi qərar qəbul edib: "Bu, hazırda ancaq Gürcüstan dəmir yolu vasitəsilə mümkündür. Amma “İvanişvilinin buradakı qoçuları” elə bir tarif müəyyən etdilər ki, buna razılıq verməkdənsə, birbaşa imtina etmək daha yaxşı olardı. Məqsəd Ermənistan-Azərbaycan yaxınlaşması və Trampın dəhliz siyasətinin bloklanmasıdır, başqa heç nə. Bilmirəm, bununla Trampın diqqətini çəkmək istəyirlər, ya sadəcə Moskvanın tapşırıqlarını yerinə yetirirlər?". Mixeil Saakaşvili başqa bir məqama da diqqət çəkib: "Bu arada Azərbaycan sərhədindən keçən bütün yük maşınlarını da Tbilisinin cərimə dayanacağına göndərirlər. Sərhəddə hər birindən keçid üçün 1000 dollara qədər pul tələb edirlər ki, bu da onlar üçün əlçatmaz məbləğdir. Bu fonda isə bizim jurnalistikanın xəbərləri yalnız məhkəmələr və hansı siyasətçinin nə deməsindən ibarətdir və xəbərlərdə gözümüzün önündə oynanılan çox ciddi geosiyasi dramı demək olar ki, heç kim görmür".
AĞ Partiyanın sədr müavini Əhəd Məmmədli Sherg.az-a deyib ki, Azərbaycan və Ermənistan arasında 30 il davam edən münaqişədə ən çox qazanan ölkə Gürcüstan oldu. Ekspert bildirib ki, sadəcə, Bakı-Ceyhan-Tbilisi neft kəmərinin qonşu ölkədən keçməsi Gürcüstanın özünə gəlməsi, iqtisadi dirçəlməsi üçün kifayət idi: "Ancaq təşəkkür əvəzinə bizə minnət qoyurdular. "Onsuz da sizin başqa yolunuz yoxdur və bizim hesabımıza öz neftinizi sata bildiz" kimi iddialar səsləndirirdilər. Gürcüstanın Azərbaycandan Ermənistana daşınmalara mane olması göstərir ki, Tbilisi hökuməti bundan narahatdır. Çünki düşünürlər ki, Azərbaycan-Ermənistan arasında sülh əldə olunandan və birgə layihələrdən sonra Gürcüstan bundan kənarda qalacaq. Yəni Gürcüstanın cəlbediciliyi itəcək. Zəngəzur dəhlizinin işə düşməsindən sonra nəqliyyat və ticarət yolları, enerji xətləri Asiyadan Avropaya məhz bu dəhlizdən keçəcək. Gürcüstanın bu yanaşmasında Rusiyanın da rolu ola bilər. Hakim "Gürcü Arzusu" Partiyasının Moskva ilə yaxınlığı bəllidir. Rusiya Zəngəzur dəhlizinə ABŞ qüvvələrinin nəzarət etməsinin əleyhinədir və bu missiyanı özü həyata keçirmək istəyir. Moskva bununla bağlı 10 noyabr 2020-ci ildə imzalanmış üçtərəfli bəyanatı əsas gətirir".
Ə.Məmmədli əlavə edib ki, Gürcüstanın daha aşkar qərəzli münasibətini görsək, soydaşlarımıza qarşı təzyiqlərin olduğunu müşahidə etsək, təbii ki, Bakı götür-qoy edəcək və adekvat addımlar atacaq: "Gürcüstanla da zaman-zaman problemlərimiz olub. Həm soydaşlarımızla bağlı çətinliklərin şahidi olmuşuq, həm də Keşikçidağ Monastr Kompleksində baş verənlər xatirimizdədir. Sərhəddə keşik çəkən əsgərimizin əlindən silahını almışdılar. Eyni zamanda məshəti türklərinin öz yurdlarına geri qayıtmasına da imkan verməmişdilər. Yəni biz heç nəyi unutmuruq. Gürcüstan da suallar qarşısında qalmamaq üçün bu cür addımlara getməməlidir".
