Eldar Namazovun son açıqlaması Ramiz Mehdiyevin hakimiyyət iddiaları ilə bağlı yeni müzakirələrə səbəb olub.

1993–1999-cu illərdə Azərbaycan prezidentinin köməkçisi və Prezident Katibliyinin rəisi olmuş Eldar Namazovun “Yeni Azərbaycan TV”yə açıqlaması ölkə siyasi gündəmində geniş rezonans doğurub. Namazov Heydər Əliyevin prezidentliyinin ilk illərində Ramiz Mehdiyevin hakimiyyəti ələ keçirməyə cəhd etdiyini deyib.

Eldar Namazov bildirib ki, 1998 və 2003-cü illərdə Ramiz Mehdiyev özünü potensial prezident kimi göstərmək üçün müxtəlif cəhdlər edib. Onun sözlərinə görə, 2003-cü il prezident seçkiləri ərəfəsində Prezident Aparatında İlham Əliyevin yaşı əsas gətirilərək təcrübəsinin az olduğunu vurğulanır, Heydər Əliyevin varis kimi Mehdiyevi gördüyü barədə təbliğat aparılırdı.

Eldar Namazovun sözlərinə əsasən, Ramiz Mehdiyev tərəfdarlarının bu fəaliyyətinə görə Prezident Aparatında bəzi şəxslər cəzalandırılıb.

“Prezident Aparatında təbliğat apardıqlarına görə bəzi adamlar cəzalandırılmışdı. Prezidentin tərcüməçisi vardı, sonra o, ölkəni tərk elədi”, Eldar Namazov deyib. Lakin o, həmin tərcüməçinin kimliyi ilə bağlı məlumat verməyib.

“Yeni Sabah”ın əldə etdiyi məlumatlar həmin hadisələrin daha geniş mənzərəsini ortaya qoyur.

Mənbəmizə əsasən, prosesin mərkəzində iki şəxs dayanıb: Heydər Əliyevin uzun illər tərcüməçisi olmuş Rauf Hüseynov və onun həmyerlisi olan, həmin illərdə sərt müxalifət düşərgəsində fəaliyyət göstərən bir siyasətçi Qüdrət Həsənquliyev...

Bu arada xatırlatmaq yerinə düşər ki, Rauf Hüseynov Prezident Aparatında fəaliyyət göstərdiyi müddətdə ictimai simpatiya qazana bilən məmurlardan olub. Bir çoxları onun məmurluğunun sadəcə prezident tərcüməçiliyi ilə məhdudlaşmayacağını düşünür və gələcək siyasi karyerasının irəliləyə biləcəyindən danışırdı. Prezident Heydər Əliyevin onu xarici əlaqələr şöbəsinə müdir müavini vəzifəsinə irəli çəkməsi bu istiqamətdə ehtimalları daha da artırmışdı.

Qayıdaq, Eldar Namazovun “Prezidentin tərcüməçisi vardı, sonra o, ölkəni tərk elədi” açıqlamasına.

Mənbənin sözlərinə əsasən, 2001-ci ildə qardaşı qətlə yetirilən Q. Həsənquliyev istintaq araşdırmasından narazı qaldığı üçün məsələni ölkənin siyasi rəhbərliyinin diqqətinə çatdırmaq istəyib. Bu məqsədlə həmyerlisi olan Rauf Hüseynovla görüşür.

Görüş zamanı müxalif siyasətçi, Rauf Hüseynova qardaşının, əslində sifarişlə qətlə yetirildiyi, amma istintaq orqanının cinayəti münaqişə zəminində törədilmiş cinayət hadisəsi kimi araşdırdığından bəhs edib. Buna görə də ondan xahiş edib ki, istintaq orqanına cinayətin obyektiv araşdırılmasına tapşırıq verməsi üçün məsələnin prezident Heydər Əliyevə çatdırılmasına kömək etsin.

Mənbənin bildirdiyinə görə, müxalifətçinin bu xahişinə cavabında Rauf Hüseynov siyasi karyerasına son qoyacaq ifadəni işlədib:

“Qardaş, Heydər Əliyevi neynirsən, ölkədə hər şeyi Ramiz Mehdiyev həll edir. Mən ona məlumat verərəm”.

Q. Həsənquliyev Ramiz Mehdiyevin böyük hakimiyyət iddialarının olduğunu anlayıb. Bundan sonra o, “çox önəmli siyasi məlumatı” Heydər Əliyevə çatdırmaq üçün təcili görüş tələbi ilə ən yüksək istansiyalarla əlaqə qurub.

Çox keçmir ki, qarşı tərəfdən cavab gəlir və Heydər Əliyev müxalif siyasətçini qəbul edir.

Qəbul zamanı Q. Həsənquliyev prezidentə Rauf Hüseynovla görüşünün detallarından bəhs edir.

Görüşdən sonra Heydər Əliyev həm Ramiz Mehdiyevi, həm də Rauf Hüseynovu təcili olaraq otağına çağırtdırıb. Gərgin keçən müşavirə zamanı Rauf Hüseynov siyasətçinin dediklərini inkar edə bilməyib.

Ramiz Mehdiyev isə daha hazırlıqlı davranır: Rauf Hüseynovun fikirlərinin onun bilgisi xaricində olduğunu deyir və özünün də bu durumdan hiddətləndiyini söyləyərək məsuliyyəti üzərindən ata bilir.

Bu müşavirədə Rauf Hüseynovun siyasi karyerasına nöqtə qoyulur: onun bütün vəzifələri əlindən alınaraq Prezident Aparatından qovulur.

Müxalif siyasətçinin siyasi karyera yüksəlişinə isə yol açılır: Heydər Əliyev siyasi həssaslığına görə onu təqdir edərək parlament seçkilərinə qatılmağı təklif edir.

Q. Həsənquliyev bu təklifi qəbul edir. Parlamentə düşməyi bacaran siyasətçi tədricən müxalif siyasi kursu deyişərək prezidentin dəstəkçisinə çevrilir.