“Alim Qasımov Azərbaycan muğamına dərviş oxumağını gətirib. O dərvişlər var ee, yasda oxuyurlar. Bax o cür oxunuş tərzi gətirib. Bu yenilik deyil. Alim Qasımov bizim muğamımıza layiq olmayan, çox pis bir nəfəs gətirib. Alim “Qarabağ şikəstəsi”-ni oxuya bilmir. Niyə? Çünki yolunu dəyişib. Xan əmi necə şikəstə oxuyub. Görüm cürətləri varsa, onun kimi oxusunlar da. Oxuya bilməyəcəklər, heç biri”. Bunu Medianews.az-a açıqlamasında tanınmış müğənni Əli Mirəliyev deyib.
O daha sonra bir sıra iddialarla çıxış edib:
“Mən demirəm Alim pis oxuyan olub. Alim 1992-ci ilə qədər elə oxuyub ki, mən ağlamışam. Çünki qabağında Əbülfət Əliyev, İslam Rzayev, Hacıbaba Hüseynov, Əlibaba Məmmədov kimi sənətkarlar var idi. O muğamı dədə-baba yolu ilə oxuyub. Sonra ki, bunlar getdilər həyatdan, Alim üçün yol açıldı. Başladı muğamın içində özü üçün nələrsə uydurmağa. Ya xalça ilə göyə çıxdı, ya aya qalxdı. Belə deyil ee. Bizim muğamımız anamızın laylasından başlayır. Kosmosa, fəzaya qalxmağa ehtiyac yoxdur. Sən aşağı düş, kimsən ki, gedib yuxarı çıxmısan? Sən öz ananın laylasını oxuya bilərsən. Muğam uydurmalar sevmir. Siz muğamda, mahnılarda əlavə edə bilməzsiz. Cahangir Cahangirovun “Durnalar” əsərini sənin qızın Fərqanə sanki hind aranjimmanında oxuyur. Buna ixtiyarınız yoxdur. Sizə bu icazəni kim verib? Hardan bu ixtiyarı götürmüsüz? Musiqimizi bu günə qoymaq olmaz. Ata muğam, qızı da mahnıları zay etdi”.
Əli Mirəliyev bildirib ki, əslində heç bir sənətkar özü-özlüyündə Alim Qasımovun yeniliklərini qəbul etmir, sadəcə danışmırlar:
“Mən Alimi görsəm tanımayacam. Çünki o əvvəllər başıaşağı, fağır oğlan idi. Bəlkə indi də elə fağırdır. Alim pis oğlan deyil. Sadəcə onun əlavələrini bəyənmirəm. Seyid Şuşinskinin yazdığı tədris proqramı ilə muğam bu gün öyrədilir. Muğam klassikadır. Muğam sənətində də bir-biri ilə danışmayan xanəndələr, sənətkarlar var. Onlar vaxtında danışsaydılar Alim bu oyunu çıxarmayacaqdı. Vaxtında Arif Babayev, Təyyar Bayramov, Mənsum İbrahimov danışsaydı, Alim də yaxşı oxuyardı. Onlar ürəklərində dedilər ki, “Əli Mirəliyev düz deyir”. Mən yetim həmişə xalqın gözündə pis olmuşam. İstəyəni də var, istəməyəni də. Mən xalqımın muğamını özünə qaytarıram. Sən o muğamın içində özünü tapmalısan”.
