14 il icra başçısı işləmiş Lütvəli Babayevin oğlu, biznesmen Babəli Babazadəyə qarşı dələduzluqda ittiham sabiq baş həkim Aruz Əliyev və onun tanışı Ehtiram Kərimovun cinayət işi üzrə məhkəmə prosesi keçirilib.

Teleqraf xəbər verir ki, Bakı Ağır Cinayətlər Məhkəməsində hakim Mahirə Kərimovanın sədrliyi ilə keçirilən prosesdə zərərçəkmiş Babəli Babazadə tərəflərin suallarını cavablandırıb.

O bildirib ki, Türkiyədən qayıtdıqdan sonra Ehtiram Kərimovu tapa bilməyib. E.Kərimovun vəkili bu fikri inkar edib, deyib ki, zərərçəkmiş Türkiyədən gələndən sonra müvəkkili ilə görüşüb.

Babəli Babazadə qeyd edib ki, həmin görüşləri zamanı dələduzluqla üzləşdiyini başa düşməyib: "Sonradan polisə şikayət etdim. Onlarla çörək kəsmişdim. Ona görə iş uzandı. Mənə 30 min manat pul lazım idi. Sənəd verdim, pulu götürdüm. Evimin dəyəri 600 min manat idi. Pulu düzəltdim, bir həftə sonra pulu vermək istədim. Amma mənə xəbər vermədilər. Gəlib pulu da götürmədim. Binanın komendantı zəng etdi, dedi ki, ev əldən çıxıb. Mən inanmadım. Amma gedəndən sonra gördüm ki, ev əldən gedib".

Zərərçəkmiş qeyd edib ki, Ehtiramdan əvvəl Aruzu tanıyıb: "Aruza zəng etdim ki, birdən Ehtiram sənədi alar. Mən ona inanırdım, çünki birinci Aruzu tanımışam. Aruzun mənə nə qədər ziyan vurduğunu bilmirəm. Ondazn soruşurdum ki, pulum kimdədir, deyirdi ki, Ehtiramdadır. Biri o birində olduğunu deyirdilər. Mənə 2 milyon manatdan çox ziyan dəyib.

Sənədlərim əvvəlcə Aruzda idi. Sonra ondan sənədi özüm üçün götürdüm. 30 min manat pulu almaq üçün Ehtirama verdim. İki dəqiqə sonra Aruz zəng etdi ki, sənədi Ehtirama vermişəm, sənəd ondadır. Çünki sənəd Aruzun adına idi, sərəncam vermək hüquqi onda idi.

Aruz mənim Nərimanov rayonunda olan obyektimi satıb. Amma başqa əmlaklarını satmayıb. Mən ümumiyyətlə belə bir söz deməmişəm. Yalnız 2 milyon manatdan söhbət gedir".

Zərərçəkmiş bildirib ki, Türkiyədə olanda Ehtiram Kərimov ona ölkəyə giriş-çıxışına stop qoyulduğunu deyib: "Buna görə də Azərbaycana gələ bilməmişəm, əmlaklarımı öz adıma keçirə bilməmişəm. Sonradan Gürcüstan vasitəsilə ilə Azərbaycana gəldim, Ehtiramla görüşdüm. Dedi, evin sədləri məndədir. Bunu deyəndə yanımızda şahidlər də var".

E.Kərimov isə deyib ki, Babəli Babazadə pulunu başqasına yedirdib və ondan tələb edir: "İranılya pul verib. Özü bilir, həmin iranlı kimdir. Babəli yaxşı bilir ki, pulu kimdədir".

Daha sonra zərərçəkmiş şəxsin ibtidai istintaq zamanı izahat və ifadələrinin ziddiyyətli hissələri elan olunub. O, izahatında göstərib ki, ona 1 milyon 700 manat ziyan dəyib.

Zərərçəkmiş məhkəmədə bildirib ki, izahat verdikdəcə dəqiq məbləği müəyyən edə bilib.
İbtidai istintaq zamanı verdiyi ifadəsində göstərib ki, Aruz Əliyevi sürücüsü vasitəsi ilə tanıyıb: "Ehtiram Kərimovu Aruz vasitəsi ilə tanmışam. 7-ci mikrorayonda olan torpaq sahəsi olub. Həmin yerdə bina tikidrmək istədim. Katlavan qazdırsam da, binanı tikdirə bilmədim. Sonradan evimə vergi borcum olması ilə bağlı məktub gəldi. Mən bunu Ehtiramla Aruza dedim. Ehtiramda vergidən tanışı olduğunu, bu məsələni həll edəcəyini dedi. Aruz mənə dedi ki, sən ölkədən get, sənin 1 milyon manat vergi borcunu bağlayacaöıq. Məni Türkiyəyə yola salanda dedim ki, əmlakını satın, vergiyə olan borcumi bağlasınlar. Sonradan başa düşdüm ki, məni Türkiyəyə yola salıb, əmlakını ələ keçirmək istəyirlər. Binəqədi rayonunda olan əmlakımı 1 milyon 500 min manata satıblar, mənə heç nə verməyiblər. Aruz pulunu qaytacağını desə də, mənə heç bir vəsait qaytarmadılar".
Zərərçəkmiş Aruz Əliyevə inanması belə izah edib: "Aruz bizim ailəvi həkimimiz olub. Buna görə də ona inanmışam. Ona etibar etmişəm. Mənə dəymiş ziyanın ödənilməyib. 2 milyon manat ziyan var, onun ödənilməsini istəyirəm. Razılığa gəlmək üçün qarşı tərəfdən gəlmirlər..gəlsələr, bir nəticəyə gələrik".
Növbəti proses avqustun 28-də davam edəcək.
Qeyd edək ki, Babəli Babazadənin dostu Aruz Əliyev üçüncü şəxslə əlbir olaraq onun əmlaklarını 2 milyon manata sataraq pulunu mənimsəməkdə ittiham olunur.
Məsələ burasındadır ki, bu hadisə baş verməzdən əvvəl Babaəli Babayevin sahibi olduğu tikinti şirkətinin 1 milyon manat vergi borcu yaranıb. Bununla bağlı ona rəsmi məktub gəlib, verginin ödənilməli olduğu xatırladılıb. Bu məsələyə görə Babəli dostu Aruz Əliyevlə məsləhətləşib, ondan nə edə biləcəyini soruşub.
Aruz Əliyev özü həkim-cərrahdır. O bu cinayətin üstü açılana kimi “Uniklinika”nın baş həkimi olub.
İddia olunur ki, Aruz külli miqdarda vergi borcu yaranmış Babəliyə ölkədən çıxmasının lazım olduğunu deyib. O, tanışı Ehtiram Kərimovla əlbir olaraq eks-icra başçısının oğlunun Türkiyəyə qaçmasına nail olub.
Babəli Türkiyədə yaşadığı müddətdə Bakıdakı əmlaklarını idarə etmək üçün Aruza etibarnamə verib. O, əmlakları satışa çıxarıb. Dediyinə görə, Aruz onun etibarından sui-istifadə edib. Aruz və Ehtiram Babəlinin əmlakını ümumilikdə 2 milyon manata satıblar, həmin pulu əmlakların sahibinə vermədən dələduzluq yolu ilə şəxsi mənafelərinə sərf ediblər.
Zərərçəkmiş şəxsin şikayəti əsasında baş həkim Aruz Əliyev və Ehtiram Kərimov polis əməkdaşları tərəfindən tutulub. Onlara dələduzluq maddəsinin ən ağır bəndi ilə ittiham irəli sürülüb, hər ikisi haqda həbs qərarı verilib.
İstintaq dövründə keçmiş icra başçısı Lütvəli Babayev də dindirilib. O, cinayət işi üzrə şahid qismində tanınıb.
Təqsirləndirilən şəxslər isə ittihamları qəbul etmirlər. Onlar deyirlər ki, zərərçəkmiş əmlaklarını könüllü satdırıb, pulunu da Türkiyədə xərcləyib. İttiham olunan tərəfin iddiasına görə, Babəli ailəsinin əmlakını satıb xərclədikdən sonra vəziyyətdən çıxmaq məqsədilə dostundan istifadə edib.
Digər məlumata görə, Babəli Türkiyəyə qaçmazdan əvvəl xırda xuliqanlığa görə 15 gün həbsdə qalıb. Buraxıldıqdan dərhal sonra isə ölkədən gedib.
Xatırladaq ki, Lütvəli Babayev 2005–2007-ci illərdə Mingəçevirin, 2007–2019-cu illərdə isə Zərdabın icra başçısı işləyib.
Qeyd edək ki, iki il əvvəl bu iş üzrə zərərçəkmiş Babəli Babazadənin Azərbaycandakı biznesini Rusiyaya köçürməsi barədə mediada məlumat yayılıb. Mətbuatdakı xəbərlərə görə, o, Moskvada “Liqa-Stroy” Məhdud Məsuliyyətli Cəmiyyətini (OOO LİQA-STROY) təsis edib.