Babək rayon Qoşadizə qəsəbə sakinləri Arkoz Holdinqə etiraz olaraq, yaxınlıqdan keçən yolu bağlamağı planlaşdırırlar. Həmin yolla holdinqin Tumbul qəsəbəsindəki Daş Məhsulları Sənaye Kompleksinə material daşınır. Elə, sakinlərin də etirazı bu torpaq yola görədir.

Onlar “Gündəlik Naxçıvan”a bidirirlər ki, yoldan qalxan tox həm sağlamlıqlarına, həm də əkin-biçinə ciddi ziyan vurur:

“Toz əlindən həyətdə oturmaq mümkün deyil, adam boğulur. Təsəvvür edin ki, paltarları da evdə qurutmağa məcbur oluruq. Çünki, həyətə sərəndə tamamilə toz qonur, yenidən yumalı oluruq. Uşaqlar, özümüz toz əlindən boğuluruq, əkinlərimiz məhv olur. Holdinq bu yol vasitəsi ilə milyonlar qazanır, 10-15 min xərc çəkib, asfaltlamaq istəmir. Yol asfaltlansa, heç bir problem qalmaz. Dəfələrlə rayon icra hakimiyyətinə, holdinqin özünə şikayət etsək də, nəticə olmayıb.”

Sakinlər bu səbəbdən çıxış yolunu yolu bağlamaqda görürlər:

“Biz tələb edirik ki, ya yol asfaltlansın, ya da istismarı dayandırılsın. Başqa heç nə istəmirik. Artıq, bezmişik. Gələn həftəyə etiraz aksiyası planlaşdırmışıq. Yolu kəsib, oturaq aksiyaya başlayacağıq. Başqa yolu qalmayıb.”

“Gündəlik Naxçıvan” adı çəkilən problemi ötən ilin noyabr ayında da işıqlandırmışdı. O vaxt rayonun icra hakimiyyəti rəsmi məlumat paylaşaraq, yola tezliklə asvat çəkiləcəyini biuldirmişdi. 8 ay keçməsinə baxmayaraq, icra hakimiyyəti verdiyi sözə əməl etməyib.