Azərbaycanda siyasi mühit 44 günlük Vətən müharibəsindən sonra köklü şəkildə dəyişib. Qələbə ilə nəticələnən bu müharibə yalnız ərazi bütövlüyümüzün bərpası deyil, həm də milli ideoloji birliyin formalaşması baxımından dönüş nöqtəsi oldu. Artıq ölkədə “hakimiyyətə qarşı olmaq üçün müxalifətdə olmaq” dövrü başa çatıb. Cəmiyyət bu gün milli maraqları, dövlətçiliyi və sabitliyi ön planda tutan, konstruktiv fəaliyyət göstərən siyasi qüvvələri dəstəkləyir. Uzun illər radikal düşərgə torpaqlarımızın 20 faizinin işğal altında qalması faktından siyasi alət kimi istifadə edir, bu ağrılı məsələdən manipulyativ şəkildə yararlanırdılar. Onlar cəmiyyətin ağrılarını istismar edir, bu yolla siyasi təsir imkanlarını qorumağa çalışırdılar. Amma Vətən müharibəsindən sonra bu rıçaq tamamilə sıradan çıxıb. Bu gün xalq yaxşı bilir ki, radikal ünsürlər nəinki dövlətə, heç xalqa da fayda gətirmir. Əksinə, belə destruktiv yanaşmalar ölkənin inkişafına, ictimai sabitliyə və milli həmrəyliyə zərbə vurur. Radikal müxalifət illərdir ölkədə keçirilən seçkilərdə istər bələdiyyə, istər parlament, istərsə də prezident seçkilərində iştirakdan imtina edirlər. Onlar seçki prosesini gözdən salmaq, ölkənin siyasi sisteminə qarşı inamsızlıq yaratmaqla məşğuldurlar. Əslində, bu partiyalar müxalifət yox, destruktiv narazılıq mərkəzinə çevrilib, anti-Azərbaycan fəaliyyət göstərirlər. Sosial şəbəkələrdə yaratdıqları "trol qrupları" vasitəsilə cəmiyyətə nifrət, təhqir və qarşıdurma püskürdür, konstruktiv düşüncəli siyasi qüvvələri ləkələməyə çalışırlar. Ölkəmizin heç bir uğurunu, qələbəsini həzm edə bilməyən radikal partiyaları üçün Azərbaycana qarşı mübarizə əsas fəaliyyət istiqamətinə çevrilib. Bu qüvvələr 44 günlük Vətən müharibəsi və tarixi Zəfərimizdən keçən beş il müddətində ölkəmizin maraqlarına qarşı bədnam əməllərini sosial media platformaları üzərindən davam edirlər. Hər fürsətdə ölkəmizdəki ictimai-siyasi sabitliyə, əmin-amanlığa kölgə salmağa çalışırlar. Cəmiyyətimiz daim dövlətimizə qarşı olan bu radikalların iç üzünə yaxşı bələddir. Tarixi Qələbəmizə, ərazi bütövlüyümüzün və suverenliyimizin tam bərpa olunmasına sevinə bilməyənlərə, milli, dövlət maraqları əleyhinə fəaliyyət göstərənlərə siyasi sistemdə yer yoxdur. Azərbaycan dövlətinə qarşı xəyanət yolunu tutan, onun sabitliyinə, təhlükəsizliyinə təhdid yaradan heç bir qüvvə siyasi sistemdə fəaliyyətini davam etdirə bilməz. Ona görə də bu radikal qüvvələr tam demokratik mühitin hökm sürdüyü siyasi sistemimizdən çıxarılmalıdır. Bu, artıq siyasi fəaliyyət deyil, sosial xaosun təbliğatıdır. Belə bir şəraitdə, bu tip radikal və dağıdıcı qrupların hüquqi müstəvidə fəaliyyətinə yenidən baxılması və fəaliyyətinə xitam verilməsi tamamilə məntiqlidir. Necə ki, bu gün bir çox demokratik ölkələr, o cümlədən Gürcüstan, cəmiyyət üçün təhdidə çevrilən destruktiv partiyalara qarşı hüquqi addımlar atır. Dövlətin və xalqın təhlükəsizliyini, sabitliyini qorumaq hər bir demokratik dövlətin borcudur.
Siyasi şərhçi Azər Niftiyev Sherg.az-a açıqlamasında deyib ki, dövlətlər təkcə səngərdə deyil, ideoloji müstəvidə də mübarizə aparırlar. Ekspert vurğulayıb ki, müasir dünyamızda ideoloji savaşlar görünməz, lakin dağıdıcı xarakter alıb:
"Kim xaotik ritmdə ideoloji sərhədlərini qoruya bilirsə, o yaşayır. Kim ki, bu sərhədləri zəif buraxırsa, özünü potensial təhlükələrin ağuşuna atır. Bu görünməz mübarizədə “fikrin silahsızlaşdırılması” siyasəti işləyir: insanın milli yaddaşını, dövlətinə inamını, kimliyini tədricən zəiflətmək. Dünya artıq oyanıb. Türkiyə paralel strukturların iç üzünü açdı, Qazaxıstan və Özbəkistan xarici manipulyasiyaları təmizlədi, Çin “kiber suverenlik” anlayışını qanuniləşdirdi, Tramp daxili və bəşəri təxribatçı qüvvələri zərərsizləşdirdi, Gürcüstanda buna qarşı mübarizə yeni mərhələyə qədəm qoydu. Hər kəs fərqindədir ki, ideoloji boşluq ərazi itkisi qədər təhlükəli məsələdir. Azərbaycan üçün də bu mövzu hər zaman aktualdır. Çünki biz müstəqilliyimizi informasiya müharibələrinin içində qoruyuruq. 90-cı illərin xaosunda dövlətə qarşı kimlər necə “oyun” qurdu, bunu hamı gördü. Eyni şəbəkələr indi fərqli adlarla, fərqli maskalarla, amma eyni məqsədlə geri dönməyə çalışırlar".
A.Niftiyev vurğulayıb ki, Ramiz Mehdiyev hadisəsi bir siqnal idi:
"Dövlətin içində və xaricdə hələ də birləşmək, köhnə ideoloji dayaq nöqtələrini bərpa etmək istəyən qüvvələr var. Onlar hələ də hesab edirlər ki, Azərbaycanı zəiflətmək mümkündür.
Bu qüvvələrin ideoloji mərkəzləri çoxdan dəyişib. AXCP və Müsavat kimi köhnə siyasi strukturlar artıq bir partiya deyil, informasiya vasitəsidir. Başqa sözlə ifadə etsək, xarici mərkəzlər üçün daxili tribuna. Əli Kərimli sosial mediada nə qədər radikal tonda danışsa da, əslində, məkrli dairələr üçün milli birliyin zəiflədilməsi planında açar fiqurlardan biridir. Onların məqsədi iqtidarı dəyişmək deyil. Dövləti yorub, cəmiyyəti inamsızlığa sürükləməkdir. Sosial şəbəkədə “azadlıq” deyib səslənən çağırışların çoxu mahiyyətcə ölkənin suverenliyini zəiflətməyə yönəlir. Bu, sırf ideoloji sabotajdır. Azərbaycanın təhlükəsizliyi indi fərqli bir mərhələdədir. Qalxan yalnız ordu deyil, həmrəylik, qətiyyətli mövqe və məsuliyyət də qalxandır. Bu ölkədə dövlətçilik ideyası yalnız Prezidentin, məmurun, partiyanın işi deyil, hər bir vətəndaşın mənəvi borcudur. İdeoloji mübarizədə güzəşt yoxdur. Dövlətin içində inamın zəifləməsi ən böyük riskdir. Ona görə də Azərbaycan bu yeni reallıqda qərarlı olmalıdır: istər “no war”çıların manipulyasiyaları, istər feminist adı altında ideoloji sabotajlar, istərsə də xaricdən maliyyələşən təxribat mərkəzləri, hamısı eyni məqsədə xidmət edir və heç şübhəsiz ki, ifşa olunacaqlar".
