Ermənistanın baş naziri Nikol Paşinyan “İrəvan dialoqu” beynəlxalq forumunda “Ermənistanla Azərbaycan arasında müharibə olmayacaq. Və mən inanıram ki, xanımlar və cənablar, (...) Ermənistan və Azərbaycan arasında müharibə olmayacaq", - deyib. Martın 14-də Paşinyan Rusiya lideri Vladimir Putinə Azərbaycanla sülh müqaviləsi üzrə danışıqların başa çatması barədə məlumat verib. Həmçinin ikitərəfli münasibətlər və regional məsələləri müzakirə ediblər. Martın 19-da Paşinyan Bakı ilə sülh müqaviləsi imzalamağa hazır olduğunu bildirib. Onun sözlərinə görə, Ermənistanla Azərbaycan arasında sülh sazişinin layihəsi artıq razılaşdırılıb.

Politoloq Məhəmməd Əsədullazadə Bizimyol.info xəbər portalına açıqlamasında bildirib ki, Ermənistan baş naziri “Azərbaycanla sülh müqaviləsi bağlamağa hazıram” deyə fikir səsləndirir: “Əsas məsələ Ermənistan Konstitusiyasının dəyişməsidir. Yəni proses bundan ibarətdir. Ermənistan buna getməlidir. Bu olmasa, hər hansı bir sülh sənədinə Azərbaycan imza atmayacaq, baxmayaraq ki, sülh, müqaviləsi razılaşdırılıb. Amma bu da əsas vermir ki, tezliklə sülh müqaviləsi bağlansın. Əldə olunan müqavilə Ermənistan Konstitusiyasına, Ermənistan qanunvericiliyinə uyğun olmaz. Çünki Ermənistan Konstitusiyasında Azərbaycana qarşı ərazi iddiaları var və cənab prezident İlham Əliyev də daima bunu qeyd edir”.

Politoloq vurğulayıb ki, Ermənistan baş naziri özünü sülhpərvər göstərməyə çalışır, amma sülhü əngəlləyən əsas faktoru ortadan qaldırmır: “Problem bundan ibarətdir. Ermənistan tərəfi konkret olaraq bu addımı atmalıdır. Əgər etmirsə, sülh müqaviləsi də bağlanmayacaq. Azərbaycan sülhü rəsmiləşdirməlidir və bu proses tam beynəlxalq hüquqa uyğun olmalıdır”.