“Nikol Paşinyan Ermənistandan qaçacaq”. Tribunainfo.az xəbər verir ki, bunu hərbi ekspert Hayk Nahapetyan deyib. O iddia edib ki, Ermənistan müxalifətinin bunun üçün imkanı var.
Nahapetyan maraqlı fikir də səsləndirib. O deyib ki, əgər Paşinyan qaçsa, onun komandasında olan məmurları həbs etməyəcəklər. “Biz onları və Paşinyanın yaxın adamlarını Azərbaycana təhvil verib, əvəzində Bakıda saxlanılan erməniləri alacağıq”.
Erməni revanşistin bu sərsəm fikirləri ciddi şəkildə tirajlanır. Ermənistanda seçki yaxınlaşdıqca ən idbar və banal fikirlər də səslənəcək. Müxalif qüvvələr indidən hakimiyyəti təhdid edir. Bununla demək istəyirlər ki, Paşinyan və komandası Ermənistana guya xəyanət edib, ona görə devriləndən sonra məmurları Bakıya təhvil verəcəklər. Bu azmış kimi, erməni ekspert sayıqlayaraq deyib ki, əvəzində Bakıdakı hərbi caniləri geri alacaqlar.
Amma Paşinyanın məmurlarından fərqli olaraq, Bakıda mühakimə olunan terrorçular ağır cinayətlər törədib, ərazilərimizdə xunta rejiminə rəhbərlik edib, qətliamlar həyata keçiriblər. Ona görə də erməni revanşistlərin bu “ideya”nı ağlından keçirməsi utopiyadan başqa bir şey deyil.
“Nikol Paşinyan mövqeyini tam dəyişir və cənab Prezidentə belə bir ritorik sual da verir: Siz istəyirsiniz ki, məni öldürsünlər?”
Bunu isə “Təmas xətti” verilişinin qonağı olan Azərbaycanın xarici işlər naziri Ceyhun Bayramov deyib. Verilişin tam versiyası yaxın günlərdə “İctimai TV”də efirə gedəcək (Modern.az).
Paşinyanın bu sözləri sülh müqaviləsinin imzalanması perspektivindən dolayı üzləşdiyi risklər kontekstində söyləməsi ehtimalı böyükdür. Dəqiqini hər halda az sonra biləcəyik.
Bəs mümkün risk və təhdidlər Paşinyana nə vəd edir? Ermənistanda çevriliş üçün zəmin varmı? Nikol Paşinyanın seçdiyi sülh yolu nə dərəcədə təhlükəlidir?
Demokratiya və İnsan Hüquqları Komitəsinin sədri Çingiz Qənizadə “Yeni Müsavat”a şərhində Ermənistanda tarixi boyu sui-qəsdlər, terror olduğunu xatırlatdı. Onun sözlərinə görə, 1999-cu ildə silahlı şəxslərin parlamentə daxil olub baş naziri, spikeri qətlə yetirməsi buna ən bariz nümunədir. Ç. Qənizadə yada saldı ki, Ermənistanda müxtəlif adlarda - ASALA, Hnçak, Armenakan və s. terror qrupları fəaliyyət göstərib: “Təbii ki, onlarla yanaşı Daşnaksütyünun adını da çəkmək lazımdır. Bu gün həmin terror təşkilatları aktiv fəaliyyət göstərməsələr də, bu ideyanı daşıyanlar, fərqli destruktiv və radikal qruplar, beyni zəhərlənmiş marginal dəstələrin olması istisna deyil. Hətta spiker Simonyan bir zamanlar, xüsusən Rusiya ilə əlaqələrin kəskin dövründə 1999-cu il hadisələrinin təkrarlanma riskinin olduğunu dilə gətirmişdi. Ona görə də ermənilərin terror və sui-qəsdə meyilli olduğunu nəzərə alsaq, Paşinyan hakimiyyəti üçün həmişə təhlükə var. Sadəcə, ABŞ və Qərb kəşfiyyatı onu qoruyur. Bu kəşfiyyat Ermənistanda ciddi şəkildə işləyir. Onlar diplomatik missiya adı ilə yerləşiblər”.
Ç.Qənizadə digər bir riskin seçkilərlə əlaqəli olduğunu açıqladı: “Gələn il parlament seçimlərində Paşinyanın partiyası qələbə qazanacaq. Xalqın müxalif partiyaların namizədlərinə üstünlük verəcəyinə inanmıram. Məsələ onda deyil ki, Paşinyan xalq üçün idealdır, sadəcə, ondan daha yaxşısı yoxdur. Bu günün müxalifət qüvvələri iqtidarda olub. Xalq onları da tanıyır. Odur ki, müxalifətin parlamenti seçki yolu ilə götürəcəyinə inanmıram. Üstəlik, Paşinyan xalqa bir sülh hədiyyə edib, Azərbaycanın tranzit qadağası da aradan qalxıb, yəni hakimiyyət erməni cəmiyyətinə real nəticələr təqdim edir, bəs müxalifət, ona dəstək verən çirkin kilsə xadimləri nə vəd edir? Onlar yenə köləlik, Rusiyanın vassalı olmaq, Cənubi Qafqazda müharibə, gərginlik, qeyri-sabit həyat, korrupsiya vəd edir. Ona görə də Paşinyan üçün qalan risk seçkinin nəticələrindən sonra müxalifətin xalqı meydanlara çıxara biləcəyi məsələsidir. Çünki bu dəfə həbsdə olan milyarder Samvel Karapetyanın komandası ciddi işləyir, kilsə də keşişlərin həbsinə görə üsyan həddindədir, Köçəryan və Daşnaksütyun partiyasına yaxın qüvvələr də gözləmə mövqeyində dayanıblar, bu baxımdan çətinlik olacağını söyləmək lazımdır”.
Hüquq müdafiəçisi qeyd etdi ki, Karapetyanın yaratdığı hərəkat seçkilərə hazırlıq görür və prosesə Rusiya dəstək verir: “Bu artıq yeni qüvvədir. Köhnə və revanşist müxalifət deyil. Paşinyan ona görə də həbslər aparır ki, seçkiyə qədər müqaviməti qırsın. Bizə də onun iqtidarda qalması sərf edir. Azərbaycan Ermənistanın revanşist və Moskvadan himayə olunan qüvvələrini iqtidarda görmək istəmir. Çünki Paşinyanla sülh prosesini yekunlaşdırmaq olar. Zənnimcə, Nikol və onun komandası ağır, gərgin proses olsa da, ondan qalib çıxacaq. Azərbaycan da siyasi dəstəyini davam etdirəcək. Biz ilk dəfə Ermənistanda iqtidarla eyni mövqeyi bölüşürük, bu da regionda dayanıqlı sülhün təmin olunması naminədir. Düşünürəm ki, həm Qərbin, həm Türkiyə və Azərbaycanın Paşinyana dəstəyi, onun mühafizə olunması, həm də özünün erməni xalqı qarşısına performansı seçkidə qələbəni təmin edəcək. Bundan sonra dəhlizin açılması və bir sıra anlaşmaların icrasına başlanacaq. Erməni xalqı da görür ki, Paşinyanın öldürülməsi və ya devrilməsi onlara xoşbəxtlik gətirməyəcək”.
Prezident yanında Dövlət İdarəçilik Akademiyasının müşaviri Zaur Məmmədov APA-ya bildirib ki, Köçəryan və Sərkisyan şəxsi ədavət, sarsılmış eqo və itirilmiş imtiyazların təsiri altında hələ də hakimiyyətə qayıda biləcəklərinə inanaraq, yeni reallıqları qəbul etmədən “tarixi missiya” illüziyası ilə yaşayırlar.
Politoloq qeyd edib ki, onlar Paşinyanı şəxsi düşmən hesab edir və nəyin bahasına olursa-olsun, ondan intiqam almağa çalışırlar: “Bu, sırf şəxsi ədavət və düşmənçilikdir. Onlar hələ də öz eqolarını boğa bilmirlər və görürlər ki, erməni cəmiyyəti artıq onları deyil, Nikol Paşinyanı seçir - bunu qəbul edə bilmirlər. Çünki erməni tarixində onlar özlərini qəhrəman, sərkərdə və mahir siyasətçi kimi görmək istəyiblər. Paşinyanın hakimiyyətə gəlməsi isə bu illüziyanı tamamilə dağıtdı. İndi artıq hamıya aydındır ki, Cənubi Qafqazda yeni reallıqlar yaranıb və bu, Ermənistanda ənənəvi daşnak ideologiyasının, militarist düşüncənin və ”Böyük Ermənistan" xülyalarının birdəfəlik dəfninə gətirib çıxara bilər".
