8 avqust Vaşinqton zirvə toplantısından sonra Azərbaycanla Ermənistan arasında sülh istiqamətində xeyli irəliləyişlər əldə olunub. Azərbaycanın yaratdığı yeni reallıqlar erməni Baş nazir Nikol Paşinyanın mövcud vəziyyətlə barışmasına səbəb olub. Nikol Paşinyan buna məcbur qalsa da, əsas məsələ onun bunu başa düşməsidir. Paşinyanın müxalifləri isə hələ də separatçılıq, revanşizm meyillərini tərk etməyiblər. Bu baxımdan 2026-cı ilin iyununda Ermənistanda keçiriləcək parlament seçkilərində kimin qalib gəlməsi proseslərə ciddi təsir göstərəcək.

Paşinyan seçilməyəcəyi təqdirdə nə olacaq?

Modern.az-a açıqlamasında politoloq Zaur Məmmədov bildirib ki, Ermənistanda gələn ilin iyununda keçiriləcək parlament seçkiləri çox böyük əhəmiyyət kəsb edir:

“Seçkilər yalnız Ermənistanda yox, Azərbaycanda da yaxından izlənilir. Ona görə ki, Cənubi Qafqazda yeni proseslər baş verməkdədir. Seçkilərin aqibəti birbaşa olaraq Cənubi Qafqazdakı proseslərə təsir edəcək. Məhz bu, bir sıra amillərlə bağlıdır. Gürcüstanda Mixail Saakaşvilini 2011-ci ildə ABŞ və Rusiya bilərəkdən hakimiyyətdən göndərdi. Nikol Paşinyanla bağlı hansı razılaşmaların olduğunu deyə bilmərik. Düşünürəm ki, ABŞ Paşinyanın yanında olacaq. Amma bu və ya digər şəkildə müəyyən danışıqlar da ola bilər".

Politoloq vurğulayıb ki, Ermənistanda hakimiyyət dəyişərsə, yeni müharibədən də danışmaq olar:

"Məlum olduğu kimi, Vaşinqton zirvə toplantısında paraflanmış sülh mətnindən sonra yeni mərhələ başlayıb. Bu gün ATƏT-in Minsk qrupunun ləğv edilməsi ilə bağlı da qərar qəbul olundu. Bizi narahat edən keçmiş məsələlər, ən əsası erməni məsələsi yoxdur. Amma təbii ki, kimlərsə erməni məsələsini yenidən gündəmə gətirmək istəyəcək, kimlərsə bu məsələ ətrafında təsir rıçaqlarını göstərmiş olacaq. Bu və ya digər şəkildə Ermənistanda parlament seçkilərinin nəticəsindən asılı olmayaraq, bəzi ölkələr tərəfindən onsuz da Cənubi Qafqazda Azərbaycana bir qədər təzyiq elementlərini artıracağını proqnoz edə bilərik. Hər halda, Azərbaycanla Ermənistan arasında yeni səhifənin açılması olduqca vacibdir. Bu, Cənubi Qafqaz üçün yeni prespektivlər vəd edən tarixi proseslərdir. Ermənistanda hakimiyyət dəyişərsə, nəinki sülh, yeni müharibədən də danışa bilərik ki, bu da məsələləri koordinal şəkildə dəyişə bilər".