Bunu Qaynarinfo-ya açıqlamasında iqtisadçı ekspert Akif Nəsirli deyil. Ekspert təklif edib ki, bunun üçün əvvəlcə bölgələrdə sabit və gəlirli iş yerləri yaradılmalıdır:

"Gənclər əsasən iş imkanlarının məhdudluğuna görə paytaxta köçürlər, ona görə də sahibkarlara güzəştli kreditlər, vergi endirimləri və investisiya təşviqləri təqdim edilməli, sənaye məhəllələri, aqroparklar və logistika mərkəzləri daha çox bölgələrdə inşa olunmalıdır. Təhsil imkanlarının keyfiyyəti də gənclərin qərarına ciddi təsir edir. Regional universitetlərin və peşə məktəblərinin maddi-texniki bazası gücləndirilməli, rəqabətədavamlı ixtisaslar bölgələrdə açılmalı və müəllimlərin bölgələrdə işləməsi üçün əlavə stimullar verilməlidir. Təhsil nə qədər keyfiyyətli olarsa, gənclər paytaxta gedib oxumaq məcburiyyətində qalmaz”.

Akif Nəsirli əlavə edib ki, bölgələrdə sosial və mədəni mühitin zəifliyi də köçü artıran amillərdəndir:

"Ona görə idman zalları, kino və teatr məkanları, kitabxanalar, gənclər mərkəzləri və innovasiya məkanları artırılmalı, internet, nəqliyyat və kommunal xidmətlərin keyfiyyəti yaxşılaşdırılmalıdır. Sosial həyat zəngin olduqda gənclər öz yaşadığı şəhərdə qalmağa daha çox üstünlük verəcək. Gənclərin bölgələrdə qalması üçün maaşların rəqabətli olması və karyera imkanlarının genişlənməsi də önəmlidir. Əgər bölgələrdə yüksək ixtisas tələb edən işlər açılarsa və karyera artımı üçün şərait yaradılarsa, gənclərin Bakıya yerləşmək ehtiyacı azalacaq”.

Akif Nəsirli hesab edir ki, bəzi dövlət qurumlarının və iri müəssisələrin regionlara köçürülməsi həmin bölgələrdə iqtisadi canlanmaya səbəb ola bilər:

"Belə mexanizm bir çox ölkədə paytaxt üzrə yükü azaltmaq üçün istifadə olunur və özünü doğruldur. Yaşayış şəraitinin yaxşılaşdırılması, əlçatan mənzil proqramlarının genişləndirilməsi və gənclər üçün münasib yaşayış komplekslərinin tikilməsi də gənclərin bölgələrdə qalma motivasiyasını artıran vacib amillərdəndir”.

Akif Nəsirlinin fikirincə, problemin həlli təkcə köçü məhdudlaşdırmaqdan ibarət deyil:

"Əsas məqsəd regionlarda iş, təhsil, sosial həyat və inkişaf imkanlarını elə səviyyəyə çatdırmaqdır ki, gənclər üçün Bakıya köçmək bir zərurət deyil, yalnız seçim olsun. Regionların həyat keyfiyyəti yüksəldikcə gənclərin paytaxta axını da təbii şəkildə azalacaq”.

Milli Məclisin deputatı Naqif Həmzəyev gələn il üçün büdcə layihəsinin müzakirəsi zamanı regionlarda yaşayan gənclərin Bakı şəhərinə axınının qarşısının alınması üçün xüsusi tədbirlərin həyata keçirilməsinin vacib olduğunu bildirib:

"Bəlkə kəndlərdən şəhərlərə köçü başa düşmək olar. Amma şəhərlərdən Bakıya köç bizi düşündürməlidir”.