Əmək və Əhalinin Sosial Müdafiəsi Nazirliyinin tabeliyində Dayanıqlı və Operativ Sosial Təminat (DOST) Agentliyi tender müsabiqəsi elan edib.
Yeniavaz.comxəbər verir ki, DOST Agentliyi “DOST Rəqəmsal İnnovasiyalar Mərkəzi” MMC üçün inzibati bina sahəsinin icarəsinin götürülməsi məqsədi ilə 5 milyon 300 min 120 manat vəsait ayırmağı planlaşdırıb.
Məlumat üçün bildirək ki, DOST Agentliyi icarəyə götürmək istədiyi binanın Bakı şəhərində mərkəzi rayonlarda (Zona 3) olmasını istəyir. Ofisin ümumi sahəsi 7 800 kv. metr olmalıdır. Binada otaq sayı ən azı 85 olmalıdır. Rəhbər otaqlarının ayrıca sanitar qovşağı olmalıdır. Mətbəxin sayı isə 6 otaqdan az olmamalıdır. DOST Agentliyi belə bir binanı 28 ay müddətinə icarəyə götürmək istəyir.
Açıqlanan məlumatlardan da göründüyü kimi, DOST Agentliyi icarəyə götürmək istədiyi ofis sahəsinə hər ay 189 min 290 manat ödəmək niyyətindədir.
Tender müsabiqəsi ilə bağlı sənəd qəbulu noyabr ayının 4-ə kimi davam edəcək.
Onu da qeyd edək ki, 2023-cü ildə DOST Agentliyi “DOST Rəqəmsal İnnovasiyalar Mərkəzi” üçün Səfərova Sahibə Paşa qızı adlı vətəndaşa məxsus 3 500 kv. metr qeyri yaşayış sahəsini 17 ay müddətində icarəyə götürüb və icrə haqqı olaraq 969 min 999 manat 94 qəpik (ayda 57 min manat) ödəyib.