Rusiyada bəzi Qərb istehsalı olan cizgi filmlərinə və internet oyunlarına qadağa qoyulması təklif olunur. Dövlət Duması təmsilçiləri bildirirlər ki, belə cizgi filmləri Rusiyada vətənpərvərlik dəyərlərini sarsıdır, qəhrəmanların mənfi imicinin formalaşdırır.

Ruslar bu dəfə Şreki hədəfə aldılar

Bizim.Media xəbər verir ki, rus deputatlar “Şrek”, “Monsters Inc.”, “Qrinç” cizgi filmlərini uşaqlar üçün zərərli hesab edirlər.

Belə düşünürlər ki, Qərb qəhrəmanları həm fiziki görünüşünə, həm də əxlaqi sapmalarına görə mənfi personajlardır, lakin müsbət kimi təqdim olunurlar, nəticədə uşaqlarda yaxşılıq qavrayışını təhrif edirlər. Bu da mənəvi və fiziki formalaşma prosesində olan uşaq və yeniyetmələr üçün çox təhlükəlidir.

“Müasir ekranlarda xarici və daxili qüsurları olan Şrek kimi personajlar ənənəvi yaxşı qəhrəmanları əvəz edir”.

Sosioloqlar isə bildirirlər ki, Rusiyada Qərb istehsalı olan cizgi filmlərinə tətbiq edilən qadağa, son illərdə artan geosiyasi gərginliklərin və siyasətin bir hissəsi kimi qiymətləndirilə bilər. Bu qərarın əsas motivləri arasında əslində xarici təsirlərin azaldılması, yerli istehsalın təşviqi nəzərdə tutulur, amma “ənənəvi dəyərlərin qorunması” kimi göstərilir.

Nəzərə alsaq ki, bu cizgi filmləri, xüsusən “Şrek” Azərbaycanda da maraqla izlənilir. Bəs eyni təşəbbüs ortaya atıla, həmin cizgi filmlərinin yayımı qadağan oluna bilərmi?

Kinoşünas Aslan Məcidə görə, çətin ki qadağa olunsun. Azərbaycanda xarici cizgi filmləri, xüsusən də Disney, DreamWorks məhsulları təkcə uşaqlar arasında deyil, onların valideynləri arasında da çox məşhurdur.

“Həmin cizgi filmlərinin çoxuna, hər nə qədər düşüncə tərzimizə zərərli olsa da, özümüz də maraqla baxmışıq. Bəziləri hələ də öz uşaqlarına qoşulub baxır. Ona görə də bu cizgi filmlərinin birdən-birə qadağan edilməsi ictimai narazılığa səbəb ola bilər”.

Müəyyən məhdudiyyətlər tətbiq oluna bilər...

Kinoşünas həmçinin diqqətə çatdırır ki, yerli alternativlərin olmaması və ya zəif olması da Qərb cizgi filmlərinin qadağasını sual altında qoya bilər.

“Hazırda Azərbaycanda yerli istehsal cizgi filmlərinin sayı və keyfiyyəti hələ ki, Qərb istehsalları ilə rəqabət apara biləcək səviyyədə deyil. Bu da belə bir qadağanın reallıq baxımından mümkünlüyünü azaldır. Azərbaycanda uşaq kontentinə nəzarət daha çox etik və milli-mənəvi dəyərlərin qorunması yönündə tətbiq olunur. Qərb istehsalına qarşı ümumi qadağa isə hələ ki, gündəmdə deyil. Amma gələcəkdə bu məsələ ictimai müzakirəyə çıxarılsa, düşünürəm ki, bəlkə də müəyyən məhdudiyyətlər və ya nəzarət tətbiq oluna bilər”.

Məlumat üçün bildirək ki, indiyədək Azərbaycanda konkret bir cizgi filminə rəsmi qadağa qoyulmayıb. Amma bəzi cizgi filmlərinin məzmunu və təsiri ilə bağlı müzakirələr aparılıb.

Məsələn, 2012-ci ildə məşhur sovet cizgi filmi “Nu, poqodi!”nin Rusiyada gündüz saatlarında televiziyada yayımına məhdudiyyət qoyulması qərarı Azərbaycanda da müzakirə mövzusu olmuşdu. Lakin Mədəniyyət və Turizm Nazirliyindən bu cizgi filminin uşaqlara zərərli vərdişlər aşılamadığı və Azərbaycanda yayımına qadağa qoyulmayacağı fikrini bildirmişdi.