İyunun 3-də 109 saylı Qazax Seçki Dairəsindən millət vəkili seçilmiş, Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri, Avropa İttifaqı Parlament Əməkdaşlıq Komitəsindəki nümayəndə heyətinin rəhbəri Səməd Seyidov və Qazax Rayon İcra Hakimiyyətinin başçısı Rəcəb Babaşov qarşıdan gələn Qurban bayramı ərəfəsində Qazax Rayon Mərkəzi Xəstəxanasında çalışan səhiyyə işçiləri, şöbə müdirləri və həkimlərlə görüşüblər.
Millət vəkili və rayon rəhbərliyi əvvəlcə xəstəxanada fəaliyyət göstərən, eləcə də yeni yaradılmış şöbələrdə olub, vətəndaşlara səhiyyə sahəsində göstərilən xidmətlərlə, yeniliklərlə maraqlanıblar.
Qazax Rayon İcra Hakimiyyətinin başçısı Rəcəb Babaşov səhiyyə işçilərini qarşıdan gələn Qurban bayramı münasibətilə təbrik edib, səmimi ürək sözlərini çatdırıb. Səhiyyə işçiləri ilə görüşən icra başçısı hər zaman olduğu kimi, bugünkü görüşün təməlində də ölkə Prezidentinin vətəndaşlara olan diqqət və qayğısının, ölkə rəhbərinin verdiyi tapşırıq və tövsiyələrin dayandığını bildirib. Rayon rəhbəri mənfur düşmənlə 168 km sərhəddə yerləşən Qazax rayonunda belə yüksək səviyyədə xəstəxananın tikintisinə görə qazaxlıların, xüsusilə də səhiyyə sahəsində çalışan insanların ölkə başçısı İlham Əliyevə bu gün də minnətdarlıq etdiklərini söyləyib. Prezident İlham Əliyev və Birinci vitse-prezident Mehriban xanım Əliyevanın rəhbərliyi altında ölkəmizdə koronavirus (COVID-19) infeksiyasına qarşı aparılan mübarizə tədbirlərindən, əhalinin vaksinasiyası sahəsində görülən işlərdən söz açan icra başçısı bu işdə, əhalinin peyvəndlənməsi sahəsində uğurun əldə olunmasında həkimlərin, tibb işçilərinin böyük əməyi olduğunu vurğulayıb. Xəstə yaxınlarının ümid yerinə çevrilən həkimlərin və tibb işçilərinin koronavirus infeksiyası ilə mübarizə tədbirlərində, xüsusilə də əhalinin vaksinasiya olunmasında gördükləri işlərin danılmaz olduğunu söyləyib. Müzəffər Ali Baş Komandan İlham Əliyevin rəhbərliyi altında şanlı Azərbaycan Ordusunun 44 günlük Vətən müharibəsində qazandığı tarixi Qələbədən danışan icra başçısı bizlərə şanlı qələbəni bəxş edən qəhrəman oğullarımızı unutmadığımızı, onlarla hər zaman fəxr edib, qürur duyduğumuzu bildirib. 44 günlük savaşda əldə etdiyimiz Zəfərə görə Ali Baş Komandana, Azərbaycan Ordusunun əsgər və zabitlərinə, şəhidlərimizə, qazilərimizə borclu olduğumuzu qeyd edib. İcra başçısı istər koronavirus pandemiyası ilə mübarizədə, istərsə də 44 günlük Vətən müharibəsi dövründə ölkəmizin tibb işçilərinin öz vəzifə borclarını ləyaqətlə yerinə yetirdiklərini bildirib. Həkimlərimizin həm ümumbəşəri təhlükə ilə mübarizədə, həm də döyüş cəbhəsində yaralanan əsgərlərin sağaldılaraq həyata qaytarılmasında böyük fədakarlıq göstərdiklərini vurğulayıb. "Səhiyyə sahəsi xidmət sahələri arasında öncül yerdə dayanır”, - deyən icra başçısı bu sahənin istər nizam-intizamda, istər səliqə-sahmanda, istər vətəndaşlara göstərilən səhiyyə xidmətində, istərsə də diqqət və qayğıda hər zaman nümunə olduğunu bildirib. Yüksək şəraiti olan xəstəxanada vətəndaşlara yüksək səviyyədə xidmət göstərilməli olduğunu diqqətə çatdırıb. Rayonda səhiyyə sahəsinin inkişaf etməsi, vətəndaşlara yüksək səviyyədə tibbi xidmət göstərilməsi üçün Qazax Rayon Mərkəzi Xəstəxanasında hər cür şərait yaradıldığını qeyd edib. Sağlamlığımızın keşiyində dayanan tibb işçilərinə bundan sonra da böyük səylə çalışmalarını bildirən rayon rəhbəri onlara gələcək fəaliyyətlərində uğurlar arzulayıb.
Millət vəkili Səməd Seyidov çıxış edərək səhiyyə işçilərini salamlayıb, qarşıdan gələn Qurban bayramı münasibətilə səmimi ürək sözlərini səsləndirib. Millət vəkili pandemiya və müharibə dövründə göstərdikləri fədakarlıqlara görə səhiyyə işçilərinə təşəkkür edib. Millət vəkili ölkəmizdə səhiyyə sahəsinə, bu sahədə çalışan insanlara göstərilən qayğıya görə ölkə Prezidenti İlham Əliyevə, Birinci vitse-prezident Mehriban xanım Əliyevaya qazaxlı ziyalılar adından minnətdarlığını bildirib. Millət vəkili bölgələrimizdə səhiyyə sahəsinə göstərilən qayğının bariz nümunəsi olaraq yüksək səviyyədə inşa olunmuş, müasir standartlara cavab verən, daim yeniliklərlə vətəndaşların xidmətində, sağlamlığının keşiyində dayanan Qazax Rayon Mərkəzi Xəstəxanasını qeyd edib. Millət vəkili bildirib ki, bu gün Qazax Rayon Mərkəzi Xəstəxanasına gün ərzində iki mindən çox insanın müraciət etməsi burada olan şəffaflıqdan, həkimlərin peşəkarlığından, tibbi biliklərinin yüksək səviyyədə olmasından, vətəndaşlara göstərilən səmimi münasibətdən xəbər verir. “Siz öz fəaliyyətinizlə regionda Qazax səhiyyəsinin adını təmsil edirsiniz. Ətraf bölgələrdən bura üz tutan insanlar yaxşı bilirlər ki, bu xəstəxanada dərdlərinə əlac tapacaqlar. Sizlərin pandemiya dövründə, eləcə də 44 günlük Vətən müharibəsi zamanı etdikləriniz danılmazdır”, - deyən millət vəkili buna görə ziyalılar adından tibb işçilərinə təşəkkünü çatdırıb. Millət vəkili, eyni zamanda bir ziyalı olaraq hər zaman dəstək olmağa hazır olduğunu söyləyib.
“Qazax Rayon Mərkəzi Xəstəxanası” Publik Hüquqi Şəxsin direktoru Afiq Fərruxov səhiyyə işçiləri ilə olan bugünkü görüşə görə millət vəkilinə və rayon rəhbərliyinə razılığını ifadə edib. A.Fərruxov səhiyyə sahəsinə göstərdiyi qayğıya görə dövlət başçısı İlham Əliyevə xəstəxananın kollektivi adından təşəkkür edib. Hər zaman onların qayğıları ilə yaxından maraqlanan rayon rəhbərliyinə minnətdarlığını bildirib. Bugünkü görüşü onlara olan qayğının daha bir bariz nümunəsi kimi qiymətləndirib. Bu gün vətəndaşların xidmətində durmaları üçün yüksək səviyyəli xəstəxanada yaradılan şəraitə görə dövlətimizə, ölkə başçısına minnətdar olduqlarını qeyd edib. Dövlətin səhiyyə işçilərinə olan qayğısını bundan sonra da öz əməli işləri ilə doğrultmağa çalışacaqlarını bildirib. A.Fərruxov gələcəkdə qarşıda duran vəzifələr və görülməsi nəzərdə tutulan işlər, xəstəxanada olacaq yeniliklər, yaradılan yeni sistem, yeni avadanlıqların gətirilməsi, xəstəxanaya gənc kadrların, həkimlərin cəlb olunması istiqamətində görüləcək işlər, əhaliyə göstərilən tibbi xidmətlər və bir sıra məsələlər barədə fikirlərini bölüşüb.
Görüşdə səhiyyə sahəsində uzun illər səmərəli fəaliyyətlərinə və əmək funksiyalarını yüksək peşəkarlıqla yerinə yetirdiklərinə görə “Qazax Rayon Mərkəzi Xəstəxanası” Publik Hüquqi Şəxsdə həkim-oftalmoloq, poliklinika şöbəsinin müdiri İsmayılova Raqiya Kərəm qızına, həkim-kardioloq Qəhrəmanova Samirə Vidadi qızına, həkim-kardioloq Aşurova Ayna Mədəd qızına, baş tibb bacısı Qocayeva Kəmalə Səfər qızına Qazax Rayon İcra Hakimiyyəti başçısının Fəxri Fərmanı təqdim olunub.
Fəxri Fərmanla təltif olunmuş səhiyyə işçiləri onlara göstərilən qayğıya, fəaliyyətlərinə verilən qiymətə görə rayon rəhbərliyinə razılıqlarını ifadə edib, onlara olan etimadı bundan sonra da əməli işləri ilə doğruldacaqlarını söyləyiblər.
"DİA-AZ"
