Bakı şəhər sakini Əzizəxanım Məhərrəmli bağlamasının çatdırılmaması və təhqiramiz münasibətə məruz qalması ilə bağlı "Limak Kargo" şirkətindən şikayətçidir.
O, bu barədə Bakupost.az -a müraciətində bildirib.
Ə.Məhərrəmli aprelin 30-da "Temu" platforması üzərindən sifariş verdiyi bağlamanın "Limak Kargo" tərəfindən bu günə qədər çatdırılmadığını, üstəlik şəxsi kabinetində “çatdırılıb” kimi qeydə alındığını iddia edir.
Şikayətçi bildirir ki, ardıcıl beş gün boyunca "Limak Kargo" ilə əlaqə saxlamağa çalışıb və hər zəng zamanı 25 dəqiqə gözləmədən sonra 30 manata yaxın kontur xərcləyib:
“Halbuki bağlamanın dəyəri 50 manat idi və yalnız bu məsuliyyətsizlik səbəbindən dəyərinin yarısı qədər əlavə xərc çəkmişəm. Zəng etdiyim ilk iki gündə mənə bildirildi ki, gün ərzində məlumat veriləcək və bağlama çatdırılacaq. Sonrakı zənglərdə isə “hal-hazırda araşdırılır, gün ərzində əlaqə saxlanılacaq” cavabını aldım. Nə məlumat verildi, nə də bağlama çatdırıldı.”
Ə.Məhərrəmli deyir ki, mayın 23-də "Limak Kargo"ya məxsus digər bir nömrədən ona zəng edilib və bağlamanın itirildiyi bildirilib. "Temu" üzərindən aldığı qəbzi təqdim etdikdən sonra isə ona həmin gün ərzində ödənişin geri qaytarılacağı vəd olunub:
“Göndərdim. Bildirdilər ki, ödəniş gün ərzində qaytarılacaq. O tarixdən bu günə qədər nə ödəniş edilib, nə də kimsə mənimlə əlaqə saxlayıb. Zənglərim və mesajlarım da cavabsız qalıb.”
Daha sonra o, şirkətlə yenidən əlaqə yaratmağa çalışıb. Cavab verən əməkdaş problemini həll edə bilmədiyini və rəhbərliyin hazırda ofisdə olmadığını bildirib:
“Yarım saat sonra rəhbərlikdən biri zəng edərək mənimlə təhqiramiz və alçaldıcı üslubda danışmağa başladı. İşlətdiyi ifadələr arasında “50 manat nə puldur ki, bu qədər ortalığı qarışdırmısız?”, “Sizin anlayış qabiliyyətiniz yoxdur”, “20 gün Çini gözləmisiz, bir həftə bizim pulu gözləmirsiz?”, “Mən danışanda səsini kəs” kimi sözlər var idi. Cavabını verdim. Gün ərzində ödənişin geri qaytarılacağı yenidən bildirildi. Daha sonra isə nömrəmi blok etdilər. Mənə çox maraqlıdır: bu şirkətlər hansı haqla bu qədər məsuliyyətsiz ola bilir? Müştərinin bağlamasını itirib, üzr istəmək əvəzinə ona qarşı alçaldıcı üslubda danışmaq hansı etikaya və peşəkarlığa sığır? 50 manat o rəhbər üçün əhəmiyyətsiz görünə bilər, amma kiminsə birgünlük maaşı, kiminsə son pulu ola bilər. O məbləğ kiçik olsa belə, həmin pul mənimdir. Onu itirib sonra da belə danışmaq səlahiyyəti heç kimə verilməyib.”
Şikayətçi həm maddi, həm də psixoloji zərərə məruz qaldığını vurğulayıb:
“Bu, təkcə maddi zərər deyil. Saatlarla telefonda gözləməyin, dəfələrlə vəziyyəti izah etməyin, hər dəfə cavabsız qalmağın və sonda təhqir eşitməyin verdiyi mənəvi. psixoloji zərər var ortada. Bütün bunlar sadəcə bir bağlama sifariş etdiyimə görə baş verib. "Limak Kargo"nun bu davranışı həm hüquqi, həm də etik baxımdan qəbuledilməzdir.”
Məsələ ilə bağlı Limak.az-la əlaqə saxladıq. Şirkətin adını açıqlamayan əməkdaşı Bakupost.az -a açıqlamasında ödənişlə bağlı gecikmənin olduğunu, bağlamanın itirildiyini etiraf etdi. Lakin bu gün artıq müştərinin pulunun ödəndiyini qeyd etdi. Müştərinin təhqir edilməsinə gəlincə isə, o, bu fikirlərin həqiqəti əks etdirmədiyini bildirdi.
