““Qarabağ”ın növbəti oyunda dünyanın ən güclü komandası ilə üz-üzə gəlməsi və bərabərlik oyunu bizim üçün qələbəyə bərabər oyun idi. Təxminən, 47,5 dəfə büdcə fərqi olan komanda ilə oynamaq və bu cür oyun göstərmək bir daha nümayiş etdirdi ki, "Qarabağ" və Qurban Qurbanov bu səviyyəyə gəlib çatmaq üçün böyük zəhmət çəkiblər, oyunlara eşq qoyublar. Həm də Azərbaycanın Zəfər bayramı ərəfəsində belə bir sevinci xalqımıza bəxş etmələri hər bir soydaşımızı sevindirdi. Bu oyun göstərdi ki, istək, birlik, müstəqil komanda ruhu varsa, nəticə əldə etmək mümkündür”.

Bu sözləri Pravda.az-a açıqlamasında Milli Məclisin Gənclər və idman komitəsinin üzvü Müşfiq Cəfərov deyib.

Deputat qeyd edib ki, bir çox hallarda xüsusilə futbolun hansısa təzyiqlərə, təsirlərə məruz qalması, düzgün idarəetmənin olmaması kimi məqamlar gündəmə gətirilir: “Milli komandamızın nəticələri bizi açmır. “Qarabağ” isə göstərdi ki, dönüş etmək, nəticə əldə etmək mümkündür. Komanda və komandadakı rəhbərlikdən bir çox məqamlar asılıdır. Dünənki oyun həmçinin sübut etdi ki, ölkədə futbol və "Qarabağ" kimi komanda var və o, dünyanın ən güclü komandası ilə qarşı-qarşıya gələrək öz əzmini göstərmək iqtidarındadır. Deməli, işi peşəkarlara həvalə etmək lazımdır. Peşəkar işin başında olarsa, nəticə əldə etmək mümkündür. Təbii ki, hansısa təzyiq və təsirlər də olmamalıdır. İdman elə bir sahədir, hər bir idman növünün başında duran şəxs özü müstəqil qərar verməli, öz metodologiyasını, yolunu seçməlidir ki, nəticəyə hədəflənsin. Bu nümunəni məhz "Qarabağ" Qurban Qurbanovun timsalında göstərdi”, - deputat bildirib.

Qeyd: “Qarabağ” UEFA Çempionlar Liqasının əsas mərhələsində Bakıda “Çelsi”ni qəbul edib. Tofiq Bəhramov adına Respublika Stadionunda oynanılan qarşılaşmada qalib müəyyənləşməyib - 2:2.