"Azərbaycanın BMT-nin Təhlükəsizlik Şurasının daimi üzvlərindən biri olması təşəbbüsü ilə çıxış etmək yaxşı olar".
Bu barədə Ədalət, Hüquq, Demokratiya Partiyasının ictimai-siyasi əlaqələr üzrə katibi Azər Qasımov "Sherg.az"a açıqlamasında deyib.
Ekspert bildirib ki, dünyanın yeni düzənində istər siyasi, istərsə də kommünikasiyaların mərkəzi nöqtəsi olması, enerji təminatçısı kimi rolları baxımından Azərbaycan vacib ölkəyə çevrilir:
"Azərbaycanın əhəmiyyəti dünyanın bütün aparıcı dövlətləri tərəfindən də qəbul edilir, bəyənilir. Türkiyənin bu istiqamətində Azərbaycanı dəstəkləyəcəyi şübhəsizdir. Əslində, Türkiyə də layiqli namizəddir, amma Türkiyəyə qarşı olan ölkələr çoxdur və buna imkan verməzlər. Azərbaycan öz reallığını özü yaratmaqla bunu yaxın ətrafından Yaxın Şərqə, Ərəb yarmadasına, Mərkəzi Asiyaya, Çinə, Qərbi və Şərqi Avropaya qəbul etdirdi. Azərbaycanın aparıcı dünya dövlətləri ilə bərabərhüquqlu siyasi fəaliyyəti göz önündədir. Hesab edirəm ki, Azərbaycanın dünya siyasətinin aparıcı dövlətlərinin sırasına daxil olmasının vaxtı çatıb. Bu, BMT-nin Təhlükəsizlik Şurası üçün də imic dəyişikliyi olar. Təhlükəsizlik Şurasına ən azı iki yeni dövlətin daxil edilməsi mühüm qərarların alınmasında yeni mərhələ yarada bilər. Azərbaycana bu məsələdə dəstək olmaq üçün bir sıra dövlətlərlə iş aparılmalıdır".
