ABŞ-nin aparıcı media orqanları Pentaqonun yeni mətbuat qaydalarını imzalamaqdan imtina ediblər.
Teleqraf xəbər verir ki, bu barədə “The Guardian” məlumat yayıb.
“The New York Times”, “Washington Post”, "CNN", “Reuters”, “Associated Press”, “The Atlantic” və digər nəşrlər Pentaqonun təklif etdiyi razılaşmanı imzalamaqdan imtina edərək, onu söz azadlığını məhdudlaşdırmaq cəhdi adlandırıblar.
Yeni qaydalara əsasən, jurnalistlər anonim mənbələrdən məlumat toplaya və dərc edə bilməz, həmçinin Pentaqon binasının bəzi hissələrinə girişləri məhdudlaşdırılır.
“Washington Post”un redaktoru Mett Mürrey bildirib ki, bu tələblər ABŞ Konstitusiyasının birinci düzəlişi ilə ziddiyyət təşkil edir.
“Bu məhdudiyyətlər mətbuat azadlığını zəiflədir və məlumat toplama imkanlarını süni şəkildə məhdudlaşdırır. Biz Pentaqonun fəaliyyətini obyektiv və aktiv şəkildə işıqlandırmaqda davam edəcəyik”, - o vurğulayıb.
Qeyd edək ki, “The New York Times” redaksiyası da oktyabrın 11-də sənədi imzalamaqdan imtina etmişdi.
