Şuşa Rayon İcra Hakimiyyətinin başçısı Bayram Səfərovun uzun müddət sonra ilk dəfə əməkdar artist Cabir İmanovun vida mərasimində görünməsi diqqət çəkib. Onun ictimaiyyət qarşısına nadir hallarda çıxması birmənalı qarşılanmır. Belə ki, B.Səfərov 2009-cu ildən bu vəzifəni icra edir və Şuşanın azad olunmasından sonra onun postunu tərk edəcəyi ilə bağlı xəbərlər yayılsa da, hələ də icra başçısı kimi fəaliyyətini davam etdirir.

Şuşa kimi strateji və mədəni əhəmiyyət daşıyan bir şəhərin icra başçısının bu qədər passiv və görünməz qalması nə ilə izah olunur? Niyə onun işi ictimaiyyətin diqqətindən yayınır?

Globalinfo.az-a danışan Müasir Müsavat Partiyasının sədri Hafiz Hacıyev deyib ki, Bayram Səfərovun Şuşaya aidiyyəti yoxdur:

“Biz dəfələrlə Şuşaya səfər etmişik və orada genişmiqyaslı quruculuq işlərinin aparıldığının şahidi olmuşuq. Bu işlərdə Bayram Səfərovun hər hansı xidməti olmayıb. O, ümumiyyətlə, Şuşaya buraxılmır. Bəzən müəyyən şəxslərə arxalanaraq, onların adlarını hallandırır. Bu isə həm yersizdir, həm də ictimaiyyətə xoş gəlmir. Düşünürəm ki, belə şəxslər artıq anlamalıdırlar ki, zaman keçib, dövran dəyişib və artıq səhnədən getməyin vaxtıdır”.

H.Hacıyev qeyd edib ki, Bayram Səfərov könüllü şəkildə vəzifədən ayrılmalıdır:

“İctimai dəstək toplamaq üçün müxtəlif jestlər etsə də, artıq gecdir. Reallıq budur ki, Şuşa ilə bağlı fəaliyyəti yoxdur və ora getmək imkanından məhrum edilib. Deyilənə görə, vəzifədə olduğu dövrdə külli miqdarda vəsait toplanıb, dövlət əmlakı mənimsənilib.

Düşünürəm ki, bu tip şəxslər artıq tarixə qarışmalıdır. Yeni dövrdə köhnə düşüncəli insanlarla davam etmək mümkün deyil. Təkcə Bayram Səfərov deyil, bu dövlətdə hələ də vəzifə tutan bəzi şəxslər cəmiyyətin etimadını itirib və onların hakimiyyətdə təmsil olunması cəmiyyətdə narazılıq yaradır.

Bayram müəllim heç kimdən inciməsin. Sadəcə, artıq gedib istirahət etməlidir. Onsuz da topladıqları bir nəsil boyunca kifayət edəcək qədər çoxdur”.