Zaqatalada güclü yağışlar nəticəsində Tala çayından keçən sel 35 metr uzunluqdakı bəndi qəzalı vəziyyətə salıb.

Bizim.Media-nın yerli bürosu xəbər verir ki, həmin bəndin bu ilin yaz-yay aylarında dağılması, üçma təhlükəsi ilə üz-üzə qalması haqda xüsusi reportaj hazırlamışdıq. Bəri başdan xatırladaq ki, bənd dağılan hissədən100-ə yaxın evi hər an təhlükə gözləyir.

Son günlərdə Zaqatala rayonunda, xüsusilə Böyük Qafqaz dağlarında yağan leysan xarakterli yağış çaylarda suyun səviyyəsinin artmasına səbəb olub.

Rayon mərkəzindən keçən gur sulu Talaçayında da suyun səviyyəsi artaraq mühafizə bəndinin aşmasına səbəb olub.


Şəhər sakini Fikrət Bayramov saytımıza bildirib ki, güclü sel beton bəndə elə sürətlə çırpılıb ki, onun arxasındakı elektrik dirəyini belə yerindən oynadıb, qısaqapanma əmələ gəlib.

Sakinlər gecələr. əsasən də yağışlı günlərdə səksəkədə olduqlarını, hər an sel gəlib onların evlərini basa biləcəyi qorxusu ilə yaşayır.

Şəhər sakini Ramiz Hacıyev isə deyir ki, evləri bənd dağılan hissədən cəmi bir neçə metr aralıda yerləşir. Çaya yenidən çox sel-sular gələrsə ilk növbədə onların evini basacaq:


“60-cı illərdə salınan bu bənd, istismar müddətini başa vurub. Çoxdan çatlamışdı, çayın səthi bəndin fundamentindən aşağı düşmüşdü. Hər dəfə sel gələndə qorxu altında yaşayırıq. Bu dəfə gələn sel bəndi aşırdı. Sağ olsun aidiyyəti qurumlar gəldi suyun yönünü dəyişdilər, müvəqqəti təhlükədən bizi qutardılar. Amma təhlükə qalır. Bura tezliklə bənd vurulmasa çətin olacaq”.

Bu ilin yaz aylarında olduğu kimi payızında da Zaqatalanın dağ çaylarına çox miqdarda sel-sular gəldiyini, görülən tədbirlərə baxmayaraq torpaq, qum-çınqıl bəndləri yuyub apardığını bildirən Zaqatala Su Melorasiya Sistemlərinin İstismarı İdarəsinin baş mühəndisi Ceyhun Mirzəyev iki dəfə çayın məcrasını dəyişdiklərini lakin güclü sel nəticəsində bəndlərin dağıldığını bildirib:


“Bu bəndin 300 metr hissəsi deformasiyaya uğrayib. 35 metr hissəsi isə tamamən aşıb. Nəticədə ərazidə dərin çuxur yaranıb, torpaq aşınmaya uğrayıb və yaxınlıqda olan evlər təhlükə altında qalıb. Bəndin aşması nəticəsində, həmçinin ərazidə olan elektrik dirəkləri də də aşıb. Elektrik naqilləri zədələnib. Lakin elektrikin verilməsi dərhal bərpa olunub”.

Baş mühəndis yaranmış vəziyyəti yuxarı orqanlara çatdırdıqlarını deyib.

Qeyd olunub ki, əraziyə baxış keçirən aidiyyəti orqanlar tərəfindən sahil bərkitmə işləri görülüb, suyun məcrası dəyișdirilərək təhlükənin qarşısı nisbətən alınıb. Ancaq vətəndaşlar bildirir ki, ərazidə dərhal mühafizə bəndlərinin tikilməsi vacibdir. Əks halda bir çox ev təhlükə ilə üz-üzə qalacaq.

Ceyhun Mirzəyev onu da əlavə edib ki, il sonuna kimi ərazidə yeni beton bəndin tikilməsi planlaşdırılır.