Məktəbəqədər və Ümumi Təhsil üzrə Dövlət Agentliyinin Ümumi təhsilin təşkili şöbəsinin müdir müavini Nurlan İsmayılbəyli ötən gün təşkil edilən brifinqdə qeyd edib ki, az saatlı vakant yerlər birləşdirilərək müəllimlərə bir vakant yer kimi təqdim ediləcək.
Mövzu ilə bağlı Redaktor.az-a açıqlama verən təhsil eksperti Elşən Qafarov bildirdi ki, çox maraqlı bir vəziyyət yaranıb.
"Məktəbəqədər və Ümumi Təhsil üzrə Dövlət Agentliyi, Elm və Təhsil Nazirliyi və yaxud da ki, Təhsil İnstitutu hansı əsaslarla təsviri incəsənət müəlliminə texnologiya dərsi verəcək? Bu güya müəllimlərin saatının artırılması üçündür. Amma pedaqoji fəaliyyətlə məşğul olmaqla bağlı Nazirlər Kabinetinin 30 aprel 2020-ci il tarixli 156 saylı qərarı var. Pedaqoji fəaliyyətlə müvafiq ixtisasa pedaqoji təhsili olan şəxslər məşğul ola bilərlər. Yəni bu o deməkdir ki, texnologiya dərsini yalnız texnologiya üzrə təhsili olan, riyaziyyat dərsini yalnız riyaziyyat üzrə təhsili olan şəxslər verə bilərlər. Burada da görünən odur ki, bu, Elm və Təhsil Nazirliyinin növbəti əsası olmayan, səriştəsiz bir qərarıdır. Hətta, şöbənin müdir müavinini əsaslandırması da çox gülünc görsənir. Çox maraqlıdır onlar çəkinmədən Azərbaycan qanunlarını heçə sayaraq nə istədiklərini, nə etmək istədiklərini açıq şəkildə elan edirlər ki, biz saatları birləşdirəcəyik".
Müsahibimizin sözlərinə görə, qanunvericilik yalnız həmin sahədə təhsil alan adamın o sahədə dərs deməsinə icazə verir.
"Vakant yerlərin birləşdirilməsi anlayışı nə deməkdir? Bunun açıqlaması nədir? Məktəblərimi birləşdirirlər? Madam belədirsə, vakansiya çıxarılmamışdan qabaq elan olunmalı idi ki, filan-filan məktəblər yaxın zamanda birləşdiriləcək. Ona görə də orda əlavə dərslər verilmir və yaxud da elan eləməlidirlər ki, biz məktəbləri birləşdiririk. Birləşən məktəblərin müəllimlərinin dərs saatında problem olduğu üçün fənlərdən artıq vakansiya verməyəcəyik. İnsanlar il boyu hazırlaşıblar. Bu, açıq-aşkar görünən haldır ki, bu gün bizim pedaqoji sahədə kadr hazırlayan ali təhsil məktəblərinin proqramları qalıb bir kənarda. Müəllimlərin işə qəbulu müsabiqəsi Təhsil İnstitutu tərəfindən konkret olaraq müəyyən edilmiş bir kitab üzərindən həyata keçirilir. Müəllimlərin işə qəbulu üzrə olan proqramla müəllim hazırlığı proqramı üst-üstə düşmür. İnsanlar kütləvi şəkildə repetitor yanına, kurslara gedirlər. Bu kursların böyük bir hissəsi də elə Təhsil İnstitutunun əməkdaşlarının kurslarıdır. Biz artıq alışmışıq. May ayında da buna oxşar bir hadisə baş verdi. Mayın 31-nə belə lisey-gimnaziyalar üçün sınaqlara biletlər satmışdı. Amma bir həftə qalmış elan elədilər ki, biz ancaq altıncı sinif qəbul edirik. Yəni altını bitirmiş, altıdan yeddiyə keçənləri lisey-gimnaziyalara qəbul edirik. Kütləvi narazılıqlar fonunda geri çəkilmək məcburiyyətində qaldılar".
Elşən Qafarov bildirdi ki, bu, birinci və ya ikinci hal deyil.
"İnsanların əlində bir strategiya, plan yoxdur. Axşamlar hardasa oturub bir çay süfrəsində bir fikir söyləyirlər, qərar qəbul edirlər. Səhər də onu dərhal elan edirlər. Çox acınacaqlı vəziyyətdir. Təhsil sistemi planlı şəkildə idarə olunan bir sahədir. Amma bu şəkildə səriştəsiz idarəetmə nəticədə kütləvi narazılıqlara gətirib çıxarır. Son anda məktəblər guya ləğv olunur. Məsələn, Lənkərandakı kütləvi narazılıqları da gördük. O cümlədən də müəllimlərin işə qəbulu ilə bağlı bu narazılıqlar da. Bu onu bir daha göstərir ki, Emin Əmrullayev və onun ayrı-ayrı şirkətlərdən gətirdiyi tanışları, yəni təhsilə aid olmayan sahələrdən gətirdiyi tanışları bu gün təhsil sahəsini idarə etmək iqtidarında deyil. Nəticə ondan ibarətdir ki, burada uduzan Azərbaycan cəmiyyətidir, Azərbaycan dövlətidir, Azərbaycan millətidir, Azərbaycan təhsilidir. Məsələnin yeganə yolu düşünürəm ki, Emin Əmrullayevin qanunsuz əməlləri ilə bağlı bir hüquqi araşdırma başlamalıdır. Emin Əmrullayev və onun dostları təhsildən uzaqlaşdırılıb məsuliyyətə cəlb olunmalıdır".
