Azərbaycanın xarici işlər naziri Ceyhun Bayramovla Ermənistanın xarici işlər naziri Ararat Mirzoyan arasında telefon danışığı aparılıb.
Nazirlər telefon danışığında Vaşinqton Zirvə görüşü zamanı imzalanmış Birgə Bəyannamənin icrasını, eləcə də etimad quruculuğu tədbirlərini müzakirə ediblər.
Nazirlər həmçinin regional məsələlər ətrafında fikir mübadiləsi aparıb və birbaşa dialoqun davam etdirilməsinə hazır olduqlarını bir daha təsdiq ediblər.
Qeyd edək ki, bu, Birgə Bəyannamə imzalandıqdan sonra XİN rəhbərlərinin ilk telefon danışığıdır. Bundan öncəki danışıq isə 2022-ci ilə təsadüf etmişdi.
Politoloq Elçin Xalidbəyli Sherg.az-a söyləyib ki, Vaşinqton görüşü Cənubi Qafqazın taleyində yeni bir mərhələnin başlanğıcını qoydu:
"Bundan sonra regionda formalaşacaq geopolitik, geoiqtisadi və geostrateji proseslərin hamısı yeni dövrün şərtlərinə uyğun şəkildə cərəyan edəcək. Bu baxımdan Azərbaycan və Ermənistan arasındakı münasibətlər də yeni mərhələyə doğru irəliləyir. Çünki Vaşinqton görüşündə 30 illik bir münaqişə mərhələsi başa çatdırılıb. İndi hər iki ölkə ortaq fəaliyyət vasitəsilə yeni sülh və sabitlik dövrünün arxitekturasını qurmaq niyyətindədir. Ona görə də Azərbaycan və Ermənistan siyasi idarələri arasında ikitərəfli təmasların intensivləşməsi tamamilə gözlənilən bir prosesdir. Vaşinqton görüşündə imzalanmış sənədlərin icrası üçün bu təmaslar olduqca vacibdir. Atılacaq addımlar və əldə olunmuş anlaşmaların həyata keçirilməsi ilə bağlı aparılacaq müzakirələr Cənubi Qafqazı yeni inkişaf mərhələsinə doğru apara bilər. Azərbaycan və Ermənistan xarici işlər nazirləri arasında baş tutmuş telefon danışığı mühüm əhəmiyyət daşıyır.
Birbaşa telefon danışığı iki tərəfli münasibətlərin yeni məcraya qədəm qoyduğunu göstərir. Görünür ki, Azərbaycan və Ermənistan xarici işlər nazirləri münasibətlərin normallaşdırılması istiqamətində konkret addımlar atmaq niyyətindədirlər. Odur ki, bu telefon danışığı bu prosesin başlanğıcı kimi qiymətləndirilə bilər".
Analitik əlavə edib ki, hazırda Azərbaycan və Ermənistan arasında müzakirə olunmalı məsələlər kifayət qədər genişdir, mövcuddur:
"Xüsusilə də Vaşinqton görüşünün nəticələri bu mövzuların aktuallığını daha da artırıb. İndi hər iki ölkə daha intensiv təmaslar sayəsində qarşılıqlı maraqlar çərçivəsində həm siyasi-diplomatik münasibətlərin normallaşdırılması, həm də iqtisadi-ticari əlaqələrin qurulması, eyni zamanda iki ölkə arasında nəqliyyat-kommunikasiya xətlərinin açılması istiqamətində geniş müzakirələr aparmaq imkanı əldə edib. Bu səbəbdən böyük ehtimalla yaxın gələcəkdə Azərbaycan və Ermənistan arasında əlaqələr daha da genişlənəcək. Nəticə etibarilə bütövlükdə Cənubi Qafqazın yeni inkişaf mərhələsinə keçidi təmin ediləcək".
