Laçın rayon sakini, hazırda Ağcabədi rayonunda məskunlaşan keçmiş məcburi köçkün İbrahimova Xəyalə Uğurlu qızı tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, Məşğulluq Agentliyi tərəfindən ona iş göndərişi verilsə də, Laçın Rayon Kommunal Müəssisələri Kombinatının rəhbəri Səyyaf müəllim (soyadını dəqiqləşdirə bilmədik - müəl.) onun işini başqasına "satır":

"Mən, İbrahimova Xəyalə Uğurlu qızı, 2020-ci ildən Ağcabədi rayonunun Məşğulluq Agentliyində iş növbəsindəyəm. Agentlik tərəfindən 2 dəfə mənə iş təklif olunsa da, Laçın Rayon Kommunal Müəssisələri Kombinatının rəhbəri Səyyaf müəlim mənim adıma gələn işi başqa bir adama satmışdır.

4 ay sonra yenidən Agentlik iş təklif etsə də, Səyyaf müəllim bu dəfə də öz işguzar əməlini yerinə yetirərək, vakansiyanı satmışdır.

Qeyd edim ki, yoldaşım xəstədir, himayəmdə 3 azyaşlı uşaq var. Hər dəfə Məşğulluq Agentliyi iş üçün Səyyaf müəllimin idarəsinə göndərsə də, “məndə belə bir məlumat yoxdur", - deyib, bizi geri göndərir.

Hazırda işsizəm. Sosial şəbəkələr üzərindən səlahiyyətli qurumlara müraciət etmişəm. Lakin cavab ala bilmirəm. Xahiş edirəm, rüşvətxor Səyyaf müəllim haqqında tədbir görülsün".

Məsələ ilə bağlı Dövlət Məşğulluq agentliyinin mətbuat xidmətindən bildirdilər ki, Ağcabədi rayonunda yaşayan İbrahimova Xəyalə Uğurlu qızının müraciəti araşdırılıb: "Vətəndaş məşğulluq sistemində qeydiyyatdadır. Qarabağ Regional Məşğulluq filialı tərəfindən cari ilin may, sentyabr və oktyabr aylarında Laçın Rayon Kommunal Müəssisələri Kombinatında münasib vakansiya üzrə göndərişlər verilib. Sentyabr ayında verilən göndəriş üzrə vətəndaş işəgötürənlə görüşdə iştirak etməyib. Digər iki halda isə işəgötürən tərəfindən Xəyalə İbrahimovanın vakansiyaya uyğun olmadığı bildirilərək işə qəbulundan imtina edilib. Qeyd edək ki, Qarabağ Regional Məşğulluq filialının Ağcabədi rayon xidmət şöbəsi tərəfindən Xəyalə İbrahimovaya başqa vakansiyalarla tanış olması təklif olunsa da qəbul etməyib".