Şirvan Apellyasiya Məhkəməsində dələduzluqda təqsirləndirilən Dəmir Əkbərlinin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, sonuncu keçirilən prosesdə zərərçəkmiş D.D. (adı, soyadı şərtidir) ifadə verərək bildirib ki, hazırda təqsirləndirilən şəxslə barışmayıb, lakin ona dəymiş maddi zərərin bir hissəsi - 500 manat məbləğində Dəmir Əkbərlitərəfindən ödənilib. Qalan məbləğin isə mərhələli şəkildə, ilin sonunadək hər ay ödənilməsi barədə aralarında razılıq əldə olunub. O, təqsirləndirilən şəxsin həbs edilməsini və cəzasının ağırlaşdırılmasını istəmədiyini, buna görə də əvvəl verdiyi apellyasiya şikayətindən imtina etdiyini məhkəməyə bildirib.

Qərara əsasən, Dəmir Əkbərlinin apellyasiya şikayəti təmin edilməyib. Zərərçəkmiş şəxsin apellyasiya şikayətindən imtina edilməsi ilə əlaqədar olaraq apellyasiya şikayətinin baxışına xitam verilib.

İttiham aktına görə, Dəmir Əkbərli tamah niyyəti ilə, aldatma və etibardan sui-istifadə etmə yolu ilə özgənin əmlakını ələ keçirmək məqsədilə Şivan şəhər sakini zərərçəkmiş D.D.-ni aldadaraq onun övladını Anadolu Universitetinə attestatla qəbul etdirmək imkanına malik olması barədə yalan məlumat verib. Bu yolla o, zərərçəkmiş şəxsi inandıraraq 2024-cü ildə müxtəlif bank hesablarına və nağd şəkildə ümumilikdə 2400 manat məbləğində pul vəsaitinin köçürülməsinə və verilməsinə nail olub.

Təqsirləndirilən şəxs aldığı həmin pul vəsaitini öz şəxsi məqsədlərinə sərf edib, bununla da D.D-yə maddi zərər vurmaqla dələduzluq cinayətini törədib.

Şirvan Şəhər Məhkəməsinin hökmü ilə hökmü ilə o, 1 il 6 ay müddətə azadlığın məhdudlaşdırılması (elektron qolbaq) cəzasına məhkum edilib.