Ucarda lotereya biletləri vasitəsilə bəxtini sınamaq istəyən Əli Salmanov dəmir barmaqlıqlar arxasına gedib düşüb. O, bu hərəkətinə görə həyatının hələ bir neçə ilini də həbsxana divarları arasında keçirməli olacaq.

Bizimyol.info xəbər verir ki, lotereya oğurluğunda ittiham olunan Ucar sakini Əli Salmanov 3 il 8 ay azadlıqdan məhrum edilib. Məhkəmənin hökmünə əsasən, o, Cinayət Məcəlləsinin 177 (oğurluq) və 234.1 (narkotik əldə etmə, saxlama) maddələri ilə təqsirli bilinib.

İttihama əsasən, 1991-ci il təvəllüdlü Əli Salmanov “Ucar” Ticarət Mərkəzində lotereya biletləri satılan köşkdə satıcının yerində olmamasından istifadə edərək, vitrin şüşəsinin altından 75 ədəd bilet oğurlayıb. Onların arasında “Prestij Poz-Qazan”, “Şans yağışı” və s. lotereya biletləri olub. Nəticədə satıcıya 750 manat ziyan dəyib.

İttihamda qeyd olunub ki, polis əməkdaşları Əli Salmanovun evində axtarış apararkən şkafdan 17 qram qurudulmuş marixuana aşkar ediblər.

Əli Salmanov əvvəllər də oğurluq və narkotik ittihamı ilə məhkum edilib. O, sonuncu dəfə 3 il əvvəl azadlığa çıxıb, lakin məhkumluğu ödənilmədən yenidən həbs edilib.

Əli Salmanov məhkəmədə ifadə verərkən lotereyaları oğurladığını etiraf edib, lakin narkotik ittihamını isə qəbul etməyib. O, bildirib ki, oğurladığı biletlərin sayı isə ittihamda göstərildiyi kimi 75 ədəd yox, az olub. Onun sözlərinə görə, səhər saat 9 radələrində “Ucar” Ticarət Mərkəzinə gedib, orada lotereya satılan köşkdən 1 manatlıq lotereya alıb. Onu silib və 1 manat qazanıb. 5 dəqiqə sonra daha bir lotereya almaq üçün köşkə yaxınlaşanda satıcının olmadığını görüb. Bundan istifadə edərək, vitrin şüşəsinin altındakı biletləri götürüb, evə gəlib: “48 bilet idi. Hamısı da 10 manatlıq biletlər. Evdə lotereyaları silməyə başladım. Bəzilərində uduşlar var idi. Həmin vaxt polislər gəldi. Dedilər ki, kameraya düşmüşəm”.

Əli Salmanov ifadəsində təsdiqləyib ki, evinə baxış keçiriləndə girişdə qab-qacaq yığılan şkafa baxış keçiriləndə çaynikin içərisindən sellofana bükülü 1 ədəd kağız büküm tapılıb.

Əli Salmanov məhkəmədə ifadəsində polislərin ona təzyiq göstərdiyini bildirib. Lakin şahid qismində dindirilən polislər onun dediklərini inkar edib.