“Fikrət Cəfərli feysbuk səhfəsində barəmdə həqiqətə uyğun olmayan ifadələr yazaraq mənə böhtan atıb".

Bunu Teleqraf-a açıqlamasında Vəkillər Kollegiyasının üzvü, Vəkillərin İntizam Komissiyasının və Deontologiya Komitəsinin üzvü Elvin Əliyev bildirib.

O deyib ki, bu səbəbdən İşgəncələr Əleyhinə Araşdırma Mərkəzinin sədri F.Cəfərli ilə bağlı Binəqədi Rayon Məhkəməsinə Cinayət Məcəlləsinin 147.1-ci maddəsinə əsasən xüsusi ittiham qaydasında şikayət edib.

"Təbii ki, məhkəmənin Fikrət Cəfərli barəsində hansı qərar qəbul edəcəyindən əvvəlcədən məlumatımın olması mümkün deyildi. Yekun çıxışımda məhkəmədən ona təqsirlədirildiyi maddənin sanksiyasında olan azadlıqdan məhrum etmə cəzasının verilməsini xahiş etdim və məhkəmə tərəfindən ədalətli və qanuni qərar qəbul olundu", - vəkil söyləyib.

E.Əliyev vurğulayıb ki, F. Cəfərlinin əməlində Cinayət Məcəlləsinin 147.1-ci maddəsinin tərkibi olduğu üçün barəsində ittihamedici hökm çıxarılıb: “Mən çıxışımda şəxsin əməlində həmin maddənin sanksiyasında nəzərdə tutulmuş azadlıqdan məhrum etmə ilə bağlı cəzanın verilməsini xahiş etdim. Məhkəmə də yekunda öz qərarını çıxardı. Ümumiyyətlə mənim Fikrət Cəfərlini tutdurmağım ifadəsi düzgün deyil. Çünki məhkəmələr şəxsin istəkləri ilə deyil, qanuna əsaslanaraq qərar verirlər”.

Onun sözlərinə görə, F.Cəfərlinin sosial şəbəkə hesabında barəsində böhtan xarakterli məlumatları paylaşdığını gördüyü andan qanunla nəzərdə tutulmuş qaydada sənədləri toplayaraq məhkəməyə üz tutub.

Vəkil məhkəməyə müraciət etməmişdən əvvəl və yaxud məhkəmə araşdırması aparılan dövrdə F.Cəfərli ilə barışmaq barədə məsələyə də münasibət bildirib: “Şəxs paylaşımlarında nə qədər aqressiv idisə, məhkəmə prosesləri zamanı da bir o qədər şəxsimə qarşı aqressevlik nümayiş etdirdi. Özünü ümumiyyətlə təqsirli bilmirdi. Barışmaqla bağlı hər hansı bir addımda atmayıbdır. Buna görə də barışmaq mübahisə predmeti deyildi”.

Xatırladaq ki, İşgəncələr Əleyhinə Araşdırma Mərkəzinin sədri Fikrət Cəfərli feysbuk səhifəsində vaxtilə Elvin Əliyevin müvəkkili olmuş Elvin Allahverdiyevin şikayətini paylaşıb. Həmin yazıda iddia olunub ki, vəkil E.Əliyev E.Allahverdiyevin ailə üzvlərini aldadıb, yalan vəd verərək onların 10500 manatını alıb mənimsəyib.

Bundan sonra Elvin Əliyev Fikrət Cəfərli barəsində xüsusi ittiham qaydasında məhkəməyə şikayət verib.

İyulun 29-da F.Cəfərlinin barəsində xüsusi ittiham qaydasında olan cinayət işi üzrə məhkəmə proses keçirilib. Binəqədi Rayon Məhkəməsində hakim Zamiq Bağırovun sədrlik etdiyi prosesdə elan etdiyi hökmə əsasən F.Cəfərli 4 ay müddətinə azadlıqdan məhrum edilib və o, məhkəmə zalında həbs olunub.

Xatırladaq ki, E.Əliyev bir çox səs-küylü cinayət işlərində vəkil olub. Onun hüquqlarını müdafiə etdiyi şəxslərdən biri də meyxana ustadı Rəşad Dağlıdır. Bundan əlavə E.Əliyev Azərbaycan Xalq Cəbhəsi Partiyasının sədri Əli Kərimlini xüsusi ittiham qaydasında məhkəməyə verən Aydın Əliyevin də vəkili və nümayəndəsi idi.