2025-ci ilin yanvar-sentyabr aylarında pərakəndə ticarət şəbəkəsində 1 milyard 139,1 milyon manatlıq əczaçılıq məhsulları və tibbi ləvazimatlar satılıb.

Dövlət Statistika Komitəsinin məlumatına görə, satış 2024-cü ilin yanvar-sentyabr ayına nisbətən 21,5 % çoxdur.

Bu ilin 9 ayında alıcıların pərakəndə ticarət şəbəkəsində aldıqları bütün mallara xərclədiyi vəsaitin 2,4 % faizi əczaçılıq məhsulları və tibbi ləvazimatların alınmasına sərf olunub.

Təkcə sentyabr ayı ərzində əhali 143,6 milyon manatlıq əczaçılıq məhsulları və tibbi ləvazimatlar alıb.

Qeyd edək ki, bu günlərdə Tarif (qiymət) Şurasının dərmanlarla bağlı qəbul etdiyi qərara əsasən yeni dövlət qeydiyyatına alınan 187 dərman vasitəsinin qiymətinin yuxarı həddi təsdiq edilib.

Bu gün əhalinin 1 milyard manatdan artıq qiymətə əczaçılıq məhsulları və tibbi ləvazimatlar alması ölkədə dərmanların baha olması ilə bağlıdır?

Məsələ ilə bağlı "Cebheinfo.az"-a açıqlamasında iqtisadçı-ekspert Natiq Cəfərli bildirib ki, bu ilk növbədə dərmanların bahalaşması ilə bağlıdır:

“İkincisi, dərman preparatlarında nağdsız ödənişlərin həcmi artıb. Çünki 18 faiz əlavə dəyər vergisi (ƏDV) dərman preparatlarına tətbiq edildiyindən və “ƏDV-ni geri al” proqramı işlədiyindən insanlar daha çox kartla ödəniş etdikləri üçün artıq apteklər də nağd satışı azaldıblar.

Nə qədər çox kartla ödəniş olursa, o qədər də çox bu sahədə “ağarma” baş verir. Ona görə də burada əsas iki amil var. Dərmanların kəskin bahalaşması, digəri isə bu sahədə apteklərin satışının “ağarması” öz təsirini göstərir”.