“3 və 4 yaşım olanda qolum 3 dəfə sınıb. O vaxtdan qolumda ciddi problemlər yaranıb, əmək qabiliyyətimi itirmişəm, işləyə bilmirəm. Əlilliklə bağlı müraciət etsəm də, rədd cavabı almışam”.
Bu iddia ilə “Qafqazinfo”ya Kürdəmir rayon sakini, 1977-ci il təvəllüdlü Abbasova Cəmalə Səftər qızı müraciət edib.
O, ağrılarının daha da artdığını, bu vəziyyətdə işləyə bilmədiyini deyir: “Artıq 48 yaşım var, ağrılarım da çoxalıb. İşləyə də bilmirəm, həm səhhətim imkan vermir, həm də bu yaşda məni heç kim işə götürmür. Ailə başçısını itirmişəm, iki övladımla birlikdə kirayədə qalıram. Uşaqlarımdan biri də xəstədir. Heç olmasa, əlillik təyin olunsa, bəzi müalicə xərclərimi ödəyə bilərəm...”
C.Abbasova 2020-ci ildə əlillik təyinatı ilə bağlı müraciət etdiyini, lakin imtina aldığını deyir.
Problemlə bağlı Dövlət Tibbi-Sosial Ekspertiza və Reabilitasiya Agentliyi ilə əlaqə saxladıq. Qurumun İctimaiyyətlə əlaqələr və daxili kommunikasiya şöbəsinin müdiri Tural Qurbanov saytımıza açıqlamasında bildirdi ki, həmin şəxslə bağlı Forma-88 sənədi sistemdə rəsmiləşdirilməyib: “C. Abbasovanın əlilliyinin qiymətləndirilməsi ilə bağlı son 5 il ərzində tibb müəssisəsi tərəfindən heç bir forma-88 göndərişi rəsmiləşdirilməyib. Belə olan halda isə əlilliyin qiymətləndirilməsi mümkün olmur. Bunun üçün vətəndaş qeydiyyat üzrə tibb müəssisəsinə yaxınlaşmalıdır. Tibb müəssisəsi tərəfindən şəxslə bağlı yeni Forma-88 sənədi rəsmiləşdirildikdən sonra onun əlilliyi qanunvericiliyə uyğun olaraq təkrar qiymətləndirilə bilər”.
Həmin qərardan sonra vətəndaşın qeydiyyatda olduğu tibb müəssisəsinə heç bir müraciəti olmayıb.
Vətəndaşla əlaqə saxlanılaraq bu il oktyabrın 8-də Kürdəmir Rayon Mərkəzi Xəstəxanasına dəvət olunub, həkim-travmatoloq tərəfindən müayinə edilib. İxtisaslaşmış tibb müəssisəsində Elmi-Tədqiqat Travmatologiya və Ortopediya İnstitutunda müayinə olunması üçün göndəriş təklif olunub.
Vətəndaş müayinə olunduqdan sonra ona təyin olunmuş diaqnoz və ağırlaşmaları Nazirlər Kabinetinin 13 may 2022-ci il tarixli 187 nömrəli Qərarı ilə təsdiq edilmiş “Əlilliyin müəyyən olunması meyarları”nda qeyd olunmuş tibbi göstəriş siyahısında olduğu halda tibbi-sosial ekspertiza müayinəsinə göndərişi yenidən rəsmiləşdiriləcək”.
