“Prezident İlham Əliyev Prezident Putinin Düşənbədə keçirilən rəsmi görüşü bir neçə elementə görə olduqca vacib bir görüş kimi dəyərləndirilir. Məsələ bundadır ki, 2024-cü ilin dekabr ayında baş vermiş AZAL təyyarəsinin qəzası ilə əlaqədar olaraq iki ölkə arasında, xüsusilə də informasiya müstəvisində bir növ soyuq münasibətin bərqərar olduğunu biz gördük. Bu proses, təqribən 10 ay davam etdi. Çünki həmin dönəmdə Azərbaycanın çox haqlı olaraq dilə gətirdiyi vacib suallar var idi ki, Rusiya tərəfi bu suallara cavab verməkdən yayınırdı. Bunun əksinə olaraq, biz gördük ki, Rusiyada müxtəlif ideoloji mərkəzlərə bağlı olan informasiya platformaları vasitəsilə, hətta bir növ Azərbaycan əleyhinə fikirləri tirajlamağa cəhdlər olundu. Bəzi informasiya mərkəzləri ictimai rəydə az qala yeni bir "düşmən" obrazını yaratmağa çalışdılar”.
Bu barədə Bizimyol.info xəbər portalına Milli Məclisin deputatı Azər Allahverənov danışıb. Deputat qeyd edib ki, həm də bu təbliğat bir ideoloji rupor funksiyasını yerinə yetirən mərkəzlər milliyyətcə erməni olan neçə Aram Qabrielyanov, Marqarita Simonyan kimi şəxslər tərəfindən idarə olunur və ya Vladimir Solovyov kimi təbliğatçılar, Dövlət Dumasının Konstantin Zatulin kimi deputatları ermənipərəst mövqe üzərində öz fəaliyyətini quran şəxslər tərəfindən aparılırdı: “Azərbaycana qarşı aparılan kampaniya ona hesablanmışdı ki, iki ölkə arasında münasibətləri pozsunlar və bu münasibətlər, hətta müəyyən mənada da gərgin bir müstəviyə keçsin. Burada önəmli məsələ ondan ibarət oldu ki, xüsusilə Azərbaycan tərəfi bütün informasiya və ya ideoloji müstəvidə baş verən təxribatlara soyuqanlı yanaşdı”.
“Beynəlxalq hüququn təməl prinsiplərinə söykənərək, faktiki olaraq baş vermiş təyyarə qəzası ilə bağlı Rusiya tərəfinə ünvanladığı suallar var idi. Nəticə etibarilə, biz gördük ki, Rusiya rəsmiləri həmin sualları ya cavablandırmaq istəmirlər və ya cavablandırdıqda hansısa bir tamamilə məsələyə aidiyyəti olmayan narrativləri dilə gətirirlər. 10 aydan sonra görüş baş tutdu. İki ölkə liderləri rəsmi görüşərək, bu dəfə Azərbaycanın dilə gətirdiyi və Azərbaycan xalqını haqlı olaraq düşündürən məsələlərə dair mövqeyini açıqlamış oldu. İlk əvvəl Rusiya prezidenti bildirib ki, “təyyarə qəzasından sonra ilk zəngində təyyarənin məhz Rusiya səmasında belə bir hadisə ilə üzləşməsi səbəbindən üzrxahlığına dilə gətirib və digər tərəfdən başsağlığını bildirib”. Bunu sonuncu görüşdə Vladimir Putin xüsusilə vurğuladı. Və dedi ki, “mən bir daha bu fikirləri təkrarlayıram və söyləyirəm”.
Eyni zamanda iki çox digər vacib məsələ var ki, Azərbaycan tərəfi bunu xüsusi olaraq önə çəkirdi. Bu bilavasitə günahkarların cəzalandırılması və təzminatın ödənilməsi məsələsi idi. İndi artıq Vladimir Putin çıxışı zamanı bildirdi ki, artıq istintaq tədbirləri yekunlaşdırılmaqdadır və onun artıq əlində bəzi məlumatlar var. Yaxın günlərdə əldə etdiyi bir məlumatlar və bu məlumatlardan da bəlli olur ki, AZAL-a məxsus təyyarənin, məhz iki raketin o istiqamətə atıldığı və partlanması nəticəsində zərər dəydiyini dilə gətirir. Yəni faktiki olaraq, Qroznuda fəaliyyət göstərən havadan müdafiə sistemlərinə bağlı fəaliyyəti ilə əlaqədar olduğunu xüsusilə dilə gətirir. Bildirir ki, istintaq tədbirləri yekunlaşdıqda, konkret şəxslər buna görə cəzalandırılacaq. Məhz, bu məsuliyyətdən irəli gələrək bu hadisə zamanı xəsarət almış sərnişinlərə və dünyasını dəyişmiş şəxslərin ailə üzvlərinə təzminatın ödənilməsi məsələsini öz üzərinə götürdüyünü bildirir. Putin xüsusilə o mövqedən çıxış edir ki, təyyarənin vurulması Rusiya ərazisində baş verib və bundan irəli gələrək Rusiya üzərinə götürdüyü öhdəlikləri yerinə yetirməyə hazırdır”-deyə deputat bildirib.
Azər Allahverənov qeyd edib ki, Prezident də xüsusilə olaraq çıxışında qeyd edib ki, Rusiya təmaslarımız kəsilməmişdi, ən yüksək səviyyədə bu təmaslar var idi: “Ayrı-ayrı strukturlar daim kontaktda olurdular və hətta iki ölkə arasında strateji müttəfiqlik xarakteri daşıyan münasibətlər müxtəlif sahələrdə daha da inkişaf edirdi. Eyni zamanda, Rusiya tərəfi də xüsusilə o məsələni diqqətə çatdırdı ki, Azərbaycan və Rusiya arasında strateji müttəfiqlik münasibətlərinin inkişaf etdirilməsi olduqca vacibdir. İndiki hadisələr fonunda dövlətlər arasında münasibətlərin, xüsusilə də Azərbaycan üzərində reallaşan bir çox layihələrdə Rusiyanın iştirakı məsələsi Rusiya üçün olduqca əhəmiyyətlidir və bu görüş xüsusilə ona dəlalət edir ki, iki ölkə arasında ikitərəfli münasibətlərin tam normal məcraya yönəldilməsi, xüsusilə də bir çox açıq qalan suallara cavabların verilməsindən sonra münasibətlərin normallaşdırılması istiqamətində çox ciddi bir hərəkətlənmə olacaq. Biz ümid edirik ki, istintaq tədbirləri tez bir zamanda başa çatacaq. Cənab Prezident İlham Əliyevin xüsusilə qeyd etdiyi kimi "obyektiv istintaq aparılacaq". Bu da o deməkdir ki, çox yaxın vaxtlarda istintaq tədbirləri yekunlaşdıqdan sonra tam nəticələr açıqlanacaq. Bu nəticələrdən irəli gələrək günahkarların cəzalarını alması, təzminatın ödənilməsi baş verəcək və iki dövlət arasında olan münasibətlərdə müəyyən müstəvilərdə hər hansı bir narahatlıq elementlər varsa, yəqin ki, onun da üzərindən artıq münasibətlərin tam normal şəkildə inkişaf etdiriləcəyinin şahidi olacağıq”.
