Son günlər Ermənistan ərazisində yerləşən 102-ci Rusiya hərbi bazasında diqqətçəkən fəallıq müşahidə olunur.

Ermənistanın "Hraparak" nəşrinin yazdığına görə, artıq bir neçə həftədir ki, hər gün Gümrüdə yerləşən bu bazaya içərisində silah-sursat və müxtəlif növ hərbi texnika olan təyyarələr eniş edir. Bu fakt Rusiya ordusunun bölgədəki hərbi varlığını gücləndirdiyini və müəyyən məqsədlərə hazırlaşdığını göstərir. Hərçənd, bu hərbi daşımaların konkret məqsədi rəsmi şəkildə açıqlanmayıb, amma mövcud vəziyyət bir sıra ehtimalların irəli sürülməsinə səbəb olub.

Mövzu ilə bağlı düşüncələrini Redaktor.az-a bildirən politoloq İlyas Hüseynov bildirdi ki, Rusiyanın Ermənistana silah daşıması ciddi reaksiyalara səbəb olur və müxtəlif təhdidlər meydana çıxır:

"Çünki Rusiya Ukrayna ilə müharibə aparır və hazırda hər bir mərmiyə, gülləyə və əsgərə ehtiyacı olan bir dövlətdir. Belə olan halda, gücünü və hərbi potensialını Cənubi Qafqaza yönəltməsi bir sıra suallar doğurur. İlk növbədə, Ermənistanda gələn il parlament seçkilərinin keçirilməsi və Rusiyanın burada Nikol Paşinyanı devirmək istəyi Ermənistan daxilində ciddi müzakirələrə səbəb olur. Əlbəttə, hərbi çevriliş vasitəsilə Nikol Paşinyanın devrilməsi planları mümkündür və bu xüsusda Rusiya daha radikal addımlar ata bilər. Çünki siyasi, informativ, eləcə də kilsənin iştirakı ilə Rusiyanın bütün cəhdləri uğursuzluğa düçar olur, dərhal ifşa olunur və nəticədə Nikol Paşinyan hakimiyyətdə qalır. Hətta Qarabağdan könüllü şəkildə çıxan ermənilərin Nikol Paşinyana qarşı etirazları və onu hakimiyyətdən devirmək niyyətləri də boşa çıxıb. Belə olan halda, əlbəttə, ən son kartlar oynanılır və bu da hərbi potensialın təmin olunması ilə icra oluna bilər".

Politoloqun sözlərinə görə, digər təhdid isə Rusiya-Azərbaycan münasibətlərində yaşanan gərginliklə bağlıdır:

"Hətta Ermənistan ərazisində Rusiya qüvvələrinin miqyasının genişləndirilməsi Azərbaycan üçün də təhlükə yarada bilər. Rusiyanın təbliğatçıları və propaqandistləri isə yaranmış gərgin münasibətlər fonunda Bakını “Oreşnik”lə vurmaq çağırışları da ediblər. Digər tərəfdən, qəzaya uğrayan "Embraer" mülki təyyarəsinin komanda verən şəxsləri və icraçılarının səs yazılarının yayılması da, hesab edirəm ki, münasibətlərdə hər şeyin açıq-aydın olduğunu, lakin Rusiyanın bunu etiraf etməkdən boyun qaçırdığını göstərir. Bu və digər formalarda Rusiya Cənubi Qafqazda öz gücünü saxlamağa çalışır. Rusiya burada maraqlarının itirildiyinin də fərqindədir. Düşünürəm ki, bütün bu niyyətlərin sülh əleyhinə, təhlükəsizlik əleyhinə olan addımların fiaskoya uğrayacağı və Cənubi Qafqazın dayanıqlı sülh mərhələsinə keçəcəyi ehtimal olunur".