Ötən həftə ABŞ Konqresində Azərbaycana qarşı növbəti qərəzli təşəbbüs irəli sürülüb.

Daha dəqiq desək, 87 nəfər ermənipərəst konqresmen Prezident Donald Trampa müraciət edib. Onlar bununla bağlı Dövlət katibi Marko Rubioya məktub göndəriblər.

Demokratlar və Respublikaçılar partiyalarından olan konqresmenlər ABŞ-nin ermənilərin Qarabağa qayıdışını təmin etməyə çağırıb. 87 konqresmenin iddiasına görə, guya ermənilərin Qarabağa qayıdışı beynəlxaq hüquqa və regionda ədalətli, davamlı sülhün bərqarar olmasına uyğundur.

Qeyd edək ki, Azərbaycanla Ermənistan arasında sülh danışıqlarının getdiyi bir vaxtda ABŞ Konqresinin belə təxribatçı addımı sülhə xidmət etmir.

Xüsusilə ABŞ-nin prosesdə vasitəçilik etmə ehtimalının gündəmdə olduğu bir zamanda ermənipərəst konqresmenlərin bu məktubu danışıqlara birbaşa zərbə mahiyyəti daşıyır.

Ədalət Partiyasının sədri Mütəllim Rəhimli “Cebheinfo.az”-a açıqlamasında bildirib ki, 87 konqresmeninin müraciəti başdan sona yanlışdır:

“Əvvəla, ermənilər Qarabağı könüllü şəkildə tərk ediblər. Kimsə onları məcburi şəkildə çıxarmayıb. Ümumiyyətlə, onların böyük əksəriyyəti tarixən Qarabağda yaşamayıblar, orada doğulmayıblar. Buna görə də çox asanlıqla ərazilərimizi tərk etdilər.

Qarabağda doğulmuş və Azərbaycan vətəndaşı olan ermənilər də var. Rəsmi Bakı dəfələrlə onlara müraciət edərək, evlərində qalmalarını istəmiş və təhlükəsizliklərinə təminat vermişdi. Lakin əfsuslar olsun ki, həmin ermənilər Azərbaycan hökumətinin çağırışına adekvat cavab vermədilər”.

Siyasətçi diqqətə çatdırıb ki, hər zaman böyük dövlətlər imperialist maraqlarını reallaşdırmaq məqsədilə ermənilərdən alət kimi istifadə edirlər:

“Onların əsas niyəti ermənilərin hüquqlarını qorumaq deyil. Sadəcə olaraq regionda ABŞ-nin güclənməsinə nail olmaq istəyirlər. Ermənilərin bu cür müdafiəsi də onu göstərir ki, ABŞ Konqresi yenə də problem yaratmağa çalışır.

Konqres Azərbaycanla Ermənistan arasında sülh sazişinin imzalanması ərəfəsində belə bir məsələnin qaldırılması ilə sülhə töhfə verməkdənsə, münasibətləri daha da gərginləşdirmək xəttini tutur”.

Lakin partiya sədri vurğulayıb ki, ABŞ Konqresin bununla bağlı mövqeyi həlledici deyil:

“Hökumətin münasibəti daha vacibdir. Əgər hökumət Konqresə adekvat cavab verməsə, deməli, Tramp administrasiyası son vaxtlar sözdə bəyan etdiyi kimi, əməldə də sülhə doğru addımlar atmağa çalışır.

Çünki Qarabağdan könüllü köçən Azərbaycan vətəndaşı olan ermənilərin geri qayıtması üçün hansısa əngəl mövcud deyil. Üstəlik, bunun üçün beynəlxalq təşəbbüslərə də ehtiyac yoxdur”.