Mənzil İnşaatı Dövlət Agentliyi (MİDA) 2024-cü ilə dair maliyyə nəticələrini ictimaiyyətə açıqlayıb.
Yeniavaz.com xəbər verir ki, agentliyin aktivləri 2024-cü ildə artaraq 517 milyon manata çatıb. Bu məbləğin 114 milyon manatı uzunmüddətli, 403 milyon manatı isə qısamüddətli aktivlərdən ibarətdir.
Məlumatlardan görünür ki, MİDA bu il maliyyə resurslarının yerləşdirilməsi strategiyasını dəyişib. Əvvəllər istiqrazlara üstünlük verən qurum bu sahədəki yatırımlarını 205 milyon manatdan 97 milyon manata endirib. Azaldılan vəsaitin 106 milyon manatı isə bank depozitlərinə yönəldilib.
Digər maraqlı detal isə odur ki, 2023-cü ilin sonunda agentliyin nağd vəsaiti 228 milyon manat olduğu halda, 2024-cü ilin sonunda bu göstərici 118 milyona enib. Azalan vəsaitlər “sair aktivlər” adı altında qeydə alınıb və detallar açıqlanmayıb.
2024-cü ildə MİDA-nın borc öhdəlikləri 63 milyon manat təşkil edib. Ümumilikdə, qısa müddətli aktivlər artıb, uzunmüddətli aktivlər isə azalıb.
Agentliyin ümumi öhdəlikləri 38,8 milyon manat səviyyəsindədir, bunun 35 milyon manatı ticarət və digər kreditor borclarına aiddir.
MİDA-nın nizamnamə kapitalı 60 milyon manat artaraq 478 milyon manata yüksəlib. Qeyd edək ki, agentlik 2024-cü ildə dövlət büdcəsindən əlavə vəsait almayıb. İlin inzibati və digər ümumi xərcləri isə 4,3 milyon manat təşkil edib.
Agentlik 2024-cü ili 4,4 milyon manat mənfəətlə başa vurub. 1,7 milyon manat mənfəət vergisi çıxıldıqdan sonra isə xalis mənfəət 2,7 milyon manat olub.
Qeyd edək ki, bu göstərici ötən illə müqayisədə üç dəfə azdır: 2023-cü ildə MİDA-nın xalis mənfəəti 8,1 milyon manat təşkil edib..
Məlumatlardan həmçinin o da bəlli olur ki, “MİDA” MMC-yə ayrılan vəsaitlər də azalıb. Əgər 2023-cü ildə tikinti operatoruna 185 milyon manat yönəldilmişdisə, 2024-cü ildə bu rəqəm 120 milyon manata düşüb.