Bakının mərkəzində yeni söküntü başlayır, yerində park salınacaq.

Paytaxtın Yasamal rayonunda, “Təzəpir” məscidinin tinindən Daxili İşlər Nazirliyinin (DİN) və Baş Prokurorluğun binalarına qədər olan ərazilər sökülüb Mərkəzi Parka birləşdiriləcək.

Hazırda ərazidə yaşayan sakinlər və obyekt sahibləri ilə danışıqlar aparılır. Söküntü “Təzəpir” məscidinin tinindən yuxarıda 199 nömrəli məktəb (Süleyman Tağızadə, Mirzə Fətəli Axundov, Lev Tolstoy, Murtuza Muxtarov, Rza Quliyev küçəsi, Nizami, Zərgərpalan, Həzi Aslanov, Əli Quliyev, Bəşir Səfəroğlu, Vidadi, Çingiz Mustafayev küçələri), sol tərəfdə isə Nizami küçəsinin bir hissəsini əhatə etməklə DİN və Baş Prokurorluğun binalarına qədər olan ərazidə aparılacaq.

Söküntüdən sonra ərazidə hər hansı başqa yaşayış, qeyri-yaşayış binalarının tikintisi nəzərdə tutulmayıb və Mərkəzi Parka birləşdiriləcək. Söküləcək evlərin hər kvadratına görə 2 700 manat, qeyri-yaşayış obyektlərinin hər kvadratına görə 3 000 manat kompensasiya ödəniləcək. Maliyyələşməni Maliyyə Nazirliyi həyata keçirəcək. Hazırda əsas problem kvadratı az olan mənzillərlə bağlıdır.

Söküntü aparılacaq ərazidə xeyli sayda 15-25 kvadratmetrlik evlər var. Hökumətdə qəbul edirlər ki, onların sahiblərinə ödənilən kompensasiya ilə Bakıda yeni mənzil sahibi olmaq mümkün deyil. Ona görə də vəziyyətdən çıxış yolları axtarılır.

Məlumata görə, məsələyə Nazirlər Kabinetində baxılır və kvadratı az olan evlərlə bağlı vahid tarif hazırlanır.

Qurumun yaxın vaxtlarda söküntü zamanı az kvadratlı (20-25-30) evlərə ödənilən kompensasiya məbləği ilə bağlı qərar verməsi gözlənilir. Ümumiyyətlə, bir çox hallarda vətəndaşlar evlərin söküntüsü zamanı, xüsusilə də mərkəzi ərazidə yerləşən evlərin sakinləri öz evlərini tərk etmək istəmir. Bunu isə əsasən onunla əlaqələndirirlər ki, uzun illərdir həmin ərazidə yaşayırlar və həmin mühitə öyrəşiblər, digər ərazilərdə yaşamaq istəmirlər.

Yaxud sakinlər onlara öz əmlakları müqabilində verilən ödənişlə razılaşmırlar və qeyd edirlər ki, həmin məbləğə digər ərazidə ev almaq mümkün deyil.

Bildirək ki, belə söküntülüər zamanı hər hansı şirkət tərəfindən evlər sökülərsə, ev sahibi müəyyən müddət kirayədə yaşamalı olur ki, sökülən evin yerində tikilən binada evlə təmin olunur. Ancaq dövlət tərəfindən sökülən binalarda sakinlərə ayrılan məbləğ onların həmin ərazidə ev almasına imkan vermir.

Bu zaman vətəndaş nə etməlidir?

Daşınmaz əmlak üzrə ekspert Elnur Azadov “Cebheinfo.az”-a bildirib ki, əslində vətəndaşın əmlakı Konstitusiya ilə qorunur:

“Fərqi yoxdur, istənilən dövlət və ya özəl layihə olsa belə, vətəndaşın istədiyi təmin olunmalı, razılaşma olmalıdır. Məsələn, “Sovetski” adlanan ərazidə müstəqil qiymətləndirmə şirkətləri ərazi ilə bağlı vəziyyəti dəyərləndiriblər və orta qiyməti təyin ediblər.

Fakt odur ki, tikililərin hamısı qəzalı və ya qismən qəzalıdır. İstismar müddəti bitib, köhnəlib. Bu baxımdan təyin olunan 2 700 manat pis qiymət deyil. Ancaq ərazidən əgər vətəndaşlar köçürülürsə, vətəndaş gedib eyni qiymətə daşınmaz əmlak almaqda çətinlik çəkir.

Həmin ərazidən vətəndaş 2 700 manata əmlak ala bilərmi? Təbii ki, yox. Kütləvi sökülür, satanların da sayı azdır, vətəndaş bundan əziyyət çəkir. Vətəndaş o qiymətə də razı olmur, istəyir ki, eyni ərazidə qalsın. Belə bir problem yaranır. Təbii ki, heç kəs başqa əraziyə köçmək istəmir.

Vətəndaşlarla dövlət arasında ziddiyyət yaranır. Ola bilər ki, orada vətəndaşın elə əmlakı var ki, daha yüksək qiymət təşkil edir. Həmin 2 700 manat orta qiymətdir. Ərazinin şəhərin mərkəzində olması da, qiymətə təsir edə bilər.

Bu məsələ qiymətləndirmə şirkətlərinə verilib. Onlar da müəyyən qiymət təyin edirlər ki, buna əsasən də sakinlərə kompensasiya verilir. Elə evlər var ki, 20 kvadratmetr sahəsi var. Bunun üçün ona 54 min manat düşür. Vətəndaş gedib 54 min manata nə ala bilər? Bu kimi məsələlərdə aidiyyəti dövlət qurumu vətəndaşı məhkəməyə verir ki, “evdən çıxmır”. Vətəndaş da deyir ki, “mənim evimdə yaşayanların sayı çoxdur”.

İndividual məsələyə baxılmalıdır. Ola bilər ki, məhkəmənin qərarı ilə müəyyən razılığa gəlsinlər. Öncə məsələ, hətta mediasiyaya verilməlidir. Mediatorlar məsələylə bağlı ortaq məxrəcə gəlməlidirlər. Əgər ortaq məxrəcə gəlməsələr onda ədalətli qərar vermək üçün məhkəmədə baxıla bilər. Hər bir əmlak individual qiymətləndirilməlidir”.