Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Layiq Bəşirzadənin (adı, soyadı şərti) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Cəmilə Səfiyevanın sədrliyi ilə keçirilən prosesdə hökm oxunub.

Məhkəmənin hökmü ilə o, cinayət məsuliyyətindən azad edilib və barəsində olan işin icraatına xitam verilib.

İttihama görə, hadisə 06 may 2025-ci il tarixdə, saat 10 radələrində Abşeron rayonu ərazisində qeydə alınıb.

Belə ki, Layiq Bəşirzadə yaşadığı evdə arvadı, zərərçəkmiş İradə Bəşirzadə (adı, soyadı şərtidir) ilə mübahisə edib. Buna səbəb isə o, qadının adından istifadə etməklə müxtəlif məbləğdə kredit və borca götürdüyü pul, habelə əmlakın ödənişini etməməsi olub. İradə də bununla bağlı ərinə irad bildirib. Bu zaman Layiq qadının üzərinə hücum edib qəsdən əl, yumruq zərbələri ilə onun alın, sifət, baş nahiyələrindən, ayaq (təpik) zərbəsi ilə sol ayağından vurub. Sonra o, əli ilə zərərçəkmiş şəxsin sağ əlindən tutub sıxaraq, ardınca əl, yumruq zərbələri ilə onun bədəninin müxtəlif nahiyələrinə vuraraq İradənin sağlamlığına qəsdən yüngül zərər yetirib.

Hadisədən sonra Layiq Bəşirzadə saxlanılaraq cinayət məsuliyyətinə cəlb edilib.

İradə Bəşirzadə məhkəməyə ərizə təqdim edərək, əri ilə barışdığını, ona qarşı heç bir şikayət və tələbi olmadığını bildirib.