Məlum olduğu kimi, dabaq xəstəliyi ilə əlaqədar ölkədə ət qıtlığı yaranıb.
Oktyabrın 25-dən etibarən heyvan bazarları fəaliyyətini dayandırıb. Azərbaycan Qida Təhlükəsizliyi Agentliyi (AQTA) həmin gündən ölkə üzrə bütün heyvan bazarlarının müvəqqəti bağlandığını rəsmən açıqlayıb.
Qurumdan bildirilir ki, müxtəlif ölkələrdə xüsusi təhlükəli yoluxucu xəstəliklərin yayılması müşahidə olunur və bu hal region ölkələri, o cümlədən Azərbaycan üçün real risk yaradır. Qərara əsasən, heyvan bazarlarında dezinfeksiya, dezinseksiya və deratizasiya işləri aparılır. Tədbirlər tamamlandıqdan sonra bazarların fəaliyyəti mərhələli şəkildə bərpa ediləcək.
Lakin heyvan bazarlarının nə zaman açıqlacağı hələlik məlum deyil. Bu səbəbdən qəssablar diri heyvan tapmaqda çətinlik çəkirlər, əhali də narahatlığa görə ət almağa tərəddüd edir. Məlumatlara görə, artıq Bakıda restoranlarında, hətta şadlıq evlərindəki toy məclislərində Monqolustandan gətirilən donmuş ətdən istifadə olunur. Bu ətin kiloqramı 11-13 manata təklif olunur.
Bəs iddialar nə dərəcədə doğrudur? Restoranlar hazırda əti haradan alır və mövcud vəziyyət qiymətlərə necə təsir göstərir?
Məsələ ilə bağlı “Cebheinfo.az” paytaxtdakı bir neçə şadlıq sarayı ilə əlaqə saxlayıb.
“Həyat Saray”dan bildirilib ki, onlar müştərilərə monqol əti təklif etmir:
“Biz müştərilərə Monqolustan əti vermirik. Bizə Beyləqan və Ağcabədidən yerli quzular gəlir. Onların da sertifikatı var və möhürlüdürlər. Qiymətlər də əvvəlki kimidir, hər hansı dəyişiklik olmayıb”.
“Altun Saray”dan qeyd edilib ki, hazırda demək olar ki, toy yoxdur:
“Bizdə hələlik toy yoxdur, ümumiyyətlə, durğunluqdur. Ət məsələsi ilə müdriyyət məşğul olur. Bu vəziyyət bizim qiymətlərə təsir etməyib, çünki bi dəqiqə toylar keçirilmir, durğunluqdur”.
“Deluks” şadlıq sarayından da isə Monqolustan əti istifadə olunmadığı vurğulanıb:
“Biz Monqolustan ətindən istifadə etmirik. Mal ətindən, ümumiyyətlə, istifadə etmirik. Amma bizə maraqlıdır ki, bu dabaq xəstəliyi ilə bağlı bir nəfər belə xəstə göstərilməyib. Ona görə bu xəbərlərin yayılması şübhə doğurur. Qiymətlərə o mənada təsir edib ki, hazırda toylarımız yoxdur. Bir sözlə, toyların sayında azalma var”.
Mövzu ilə bağlı bir neçə digər şadlıq sarayı ilə də əlaqə saxlasaq da, suallarımız cavabsız qaldı.
