Rusiya prezidenti Vladimir Putinin daha bir hədəfinin olduğu üzə çıxıb. Kremlin sahibi qarşıdakı 25 ildə də hakimiyyətdə qalmaq istəyir.
Azpolitika xəbər verir ki, bu barədə Britaniyanın “Daily Star” qəzeti məlumat yayıb.
Yazının müəllifi, araşdırmaçı jurnalist İlya Davlyatçi qeyd edir ki, 97 yaşına qədər hakimiyyət kürsüsünü hədəfləyən Putin öz yerini oğlu İvana ötürmək istəyir.
Qeyd edək ki, İvan Kreml sahibinin “dillərdə dastana dönən” böyük sevgisindən - Alina Kabayevadan dünyaya gələn övladıdır. Hazırda onun 10 yaşı var və yalnız 2050-ci ildə 35 yaşı olacaq. Rusiya qanunvericiliyinə görə isə prezident seçilmək üçün vətəndaşın 35 yaşı tamam olmalıdır.
Putinin səlahiyyət müddətini artırmaq üçün 2020-ci ildə yenidən yazılmış konstitusiyaya görə, o, 2036-cı ilə və ya 83 yaşına qədər prezident qala bilər. Rusiya reallıqları nəzərə alınmaqla, əgər sağ qalarsa, həmin vaxtdan sonra Putinin hakimiyyət ömrünü uzatmaq üçün əlavə olaraq hansısa hüquqi mexanizmlər hazırlanması mümkündür.
Putinin ömrü bu planlarını həyata keçirməyə yetəcəkmi? Ən əsası, Rusiyanın siyasi elitası İvan qarşısında “yaşıl işıq” yandıracaqmı?
Siyasi təhlilçi Sona Əliyeva Musavat.com-a açıqlamasında indiki şərtlər daxilində bunun bir qədər çətin olduğunu söyləyib:
“Vladimir Putin istərsə, prezidentlik yaşını 35-dən 30-a və ya 25-ə də endirə bilər. Amma bu zaman Rusiyanı Çeçenistanın aqibəti gözləyə bilər. Bir sözlə, bu mümkün deyil. Söhbət ondan gedir ki, Rusiyada Putinin hakimiyyətdə qalmasını rus dərin dövləti - KQB-nin beyin mərkəzləri müəyyən edir. Əgər gələn ilin sonuna qədər Ukrayna cəbhəsində Vladimir Putin həlledici və öldürücü qələbə qazana bilməsə, o zaman Valodyanın özünün qələmini qıracaqlar. Rusiya dərin dövləti post-Putin dönəminə də KQB generalı ilə getmək istəyir. Bu, 300 illik Rusiya dövlətçiliyinin hakimiyyət prinsiplərinin ana xəttini təşkil edir.
Bir sözlə, Putini o posta gətirənlər axırda onu səssiz-sədasız devirəcəklər. Üstəlik, Putin Alina Kabayeva ilə münasibətlərini rəsmiləşdirməkdən, uşaqları açıq-aşkar övladları kimi təqdim etməkdən çəkinir. Bu da o deməkdir ki, Rusiyada “atadan oğula” prinsipləri işləmir. Dövlət idarəetməsinin işləkliyi mexanizmi isə hər şeydən üstün tutulur”.
Musavat.com
