"Nur"Mənzil-Tikinti Kooperativi ləğv olunduğunu elan edib.

Teleqraf xəbər verir ki, bu barədə şirkət özü məlumat yayıb.

Qeyd edək ki, MTK-nın hazırda dövlətə 305.5 manat məbləğində vergi borcu da var.

"Nur" Mənzil-Tikinti Kooperativi riskli vergi ödəyicisi hesab edilməsə də, Vergi Məcəlləsinə uyğun olaraq vergi hesabatını və ya onu əvəz edən arayışı vaxtında təqdim etmədiyinə görə şirkətə qarşı 2007, 2010, 2015 və 2016-cı illərdə ümumilikdə 6 hal üzrə 240 manatlıq maliyyə sanksiyası tətbiq edilib.

Onu da bildirək ki, MTK 2005-ci ildə dövlət qeydiyyatına alınıb, qanuni təmsilçisi Əsgərov Hüseyn Meydan oğludur. Şirkətin nizamnamə kapitalı isə 280 manat təşkil edir. Şirkət sonuncu dəfə 2017-ci ildə reyestrdən keçib.

Xatırladaq ki, bir zamanlar vətəndaşlar inşa edilmiş çoxmərtəbəli yaşayış binalarının müvafiq norma və qaydalara uyğun tikilməməsindən, bağlanmış müqavilə şərtlərinin kobud şəkildə pozulmasından və bəzi tikinti şirkətlərinin mənzilin pulunu topladıqdan sonra fəaliyyəti dayandıraraq yoxa çıxmasından ciddi şəkildə narazılıq edirdilər. Eyni zamanda, bu binaların dövlət komissiyası tərəfindən istismara qəbul edilməməsi, vətəndaşların aldıqları mənzilə mülkiyyət hüququnu rəsmiləşdirə bilməməsi, yaranan süründürməçilik halları və kommunal xidmətlərin – xüsusilə qaz və suyun vaxtında verilməməsi, bunun üçün sakinlərdən dəfələrlə əlavə ödənişlər tələb olunması geniş ictimai narazılığa səbəb olmuşdu. Bu cür hallara yol verən Mənzil-Tikinti Kooperativlərindən biri də "Nur" MTK olub.