Musavat.com xəbər verir ki, İranın “Sepah” qurumuna yaxın media resurslarında Zəngəzur dəhlizi ilə bağlı növbəti sərt bəyanatlar səsləndirilib.

Bəyanatda deyilir: "İddialara görə, guya İranın ali lideri Ayətullah Xameneinin Zəngəzur məsələsində mövqeyi yumşalıb. Lakin yayılan bu məlumatların heç bir əsası yoxdur. Ali Liderin mövqeyi ilk gündən bəri dəyişməz olaraq qalıb – sərt və prinsipial".

İran rəsmiləri bildirirlər ki, Ayətullah Xameneinin siyasi kursunda heç bir yumşalma olmayıb. Onun müşaviri Əli Əkbər Vilayətinin açıqlamaları da məhz bu sərt mövqeyin rəsmi əksi kimi səsləndirilib. Tehran tərəfindən Ermənistan tərəfinə rəsmi qaydada bildirilib ki, bu məsələdə heç bir siyasi manevr mümkün deyil.

Qeyd olunur ki, İran hər hansı xarici qüvvənin razılığına və ya icazəsinə ehtiyac duymadan, regionda qətiyyətli xətt nümayiş etdirir və bu siyasəti davam etdirəcək.

Musavat.com xatırladır ki, “Sepah” bundan əvvəl də regionda gərginlik yaradan açıqlamalarla çıxış edib. Quruma aid qüvvələr bu ilin iyununda İsraillə qarşıdurmada ciddi itkilər veriblər – qurumun rəhbəri Selami və 20-dən artıq general hədəf alınaraq məhv edilib. Buna baxmayaraq, “Sepah” yenidən sərt ritorika ilə həm Ermənistan, həm də Azərbaycan istiqamətində təhdidlərini davam etdirir.