İranın Azərbaycandakı səfirliyi Azərbaycan Xarici İşlər Nazirliyinin mətbuat katibi Ayxan Hacızadənin İran vətəndaşları olan məhkumlara münasib şəraitin yaradılması ilə bağlı açıqlamasını müsbət dəyərləndirir.
Bu barədə Trend-in sorğusuna cavab olaraq İranın Bakıdakı səfirliyindən bildirilib.
Qeyd edilib ki, iki ölkə münasibətlərində gündəmə gələn məsələlər, o cümlədən vətəndaşlarla bağlı mümkün problemlər lazımi qaydada öz həllini tapa bilər.
"Bu kontekstdə, Azərbaycan Xarici İşlər Nazirliyinin mətbuat katibinin məhkumlar üçün münasib şəraitin yaradılması, onların tibbi və səhiyyə ehtiyaclarının təmin olunması, ailələri ilə videoəlaqənin yaradılması, eləcə də məhkumların cəza müddətinin qalan hissəsini öz ölkələrində çəkməsi ilə bağlı əməkdaşlıq təkliflərini müsbət dəyərləndirir və bu sahədə əməkdaşlığa hazır olduğumuzu bəyan edirik", - səfirlikdən əlavə olunub.
Qeyd edək ki, bəzi KİV-də Azərbaycanda saxlanılan iranlı məhbusların şəraiti ilə bağlı müxtəlif nigaranlıqlar irəli sürülüb.
Məsələ ilə bağlı Azərbaycan Xarici İşlər Nazirliyinin mətbuat katibi Ayxan Hacızadə bildirib ki, Azərbaycan Respublikasının Ədliyyə Nazirliyinin penitensiar müəssisələrində saxlanılan, İran İslam Respublikasının vətəndaşı olan məhkum və həbs edilmiş şəxslərin hüquqları, qanuni mənafeləri və şəxsi təhlükəsizlikləri qorunur, onlar zəruri maddi-məişət şəraiti ilə təmin olunurlar. Qüvvədə olan qanunvericiliyin tələblərinə uyğun olaraq, məhkum və həbs edilmiş şəxslər telefonla danışmaq, bağlama almaq, ailə üzvləri ilə görüşmək və telefonla danışmaq hüquqlarından istifadə edirlər. Bəzi penitensiar müəssisələrdə İran İslam Respublikası vətəndaşı olan məhbuslara ailə üzvləri ilə video görüntü əsasında görüşlərin keçirilməsi imkanı yaradılıb.
"Həbsdə saxlanılan əcnəbilər, o cümlədən İran İslam Respublikasının vətəndaşları mütəmadi olaraq tibb-sanitariya bölməsində müayinələrdən keçirlər. Bununla yanaşı, İran İslam Respublikasının Azərbaycan Respublikasındakı Səfirliyinin əməkdaşları tərəfindən öz vətəndaşları üçün gətirilmiş dərman preparatları tibb xidmətinin əməkdaşları tərəfindən normativ aktların tələblərinə uyğun qaydada qəbul edilib və məhkumlara çatdırılıb.
Yalnız 2025-ci ildə İran İslam Respublikasının Səfirliyinin əməkdaşları ilə penitensiar müəssisələrində cəza çəkən 37 nəfər İran İslam Respublikasının vətəndaşları arasında konsul görüşünün keçirilməsi üçün şərait yaradılıb. Son olaraq belə görüş iki İran vətəndaşı ilə 31 iyul tarixində baş tutub. Azərbaycan tərəfinin həmçinin bir sıra İran vətəndaşları ilə bağlı humanistlik nümayiş etdirdiyi İran tərəfinə yaxşı məlumdur. Məhkum edilmiş bir sıra şəxslərin əfv olunması haqqında Azərbaycan Respublikası Prezidentinin 26 may 2025-ci il tarixli Sərəncamı ilə 5 nəfər İran vətəndaşı əfv olunub", - XİN rəsmisi qeyd edib.
