Cəlil Rüstəmov hansı xidmətlərinə görə Kəngərli Rayon icra başçısına müavin təyin olunub?
Bir neçə gün əvvəl, daha dəqiq desək, iyulun 10-da Naxçıvan MR Kəngərli Rayon icra başçısına müavin təyin olundu.
Hurriyyet.az xəbər verir ki, bu vəzifəyə Rüstəmov Cəlil Abbas oğlu “layiq görüldü”.
C.Rüstəmovun məlum təyinatı Muxtar Respublikada geniş söz-söhbətə səbəb olub.
Belə ki, Naxçıvan MR Ali Məclisinin keçmiş sədri Vasif Talıbova yaxınlığı ilə tanınan bu şəxsin yenidən yüksək vəzifəyə təyin olunması çoxları tərəfindən birmənalı qarşılanmır.
Qeyd edək ki, Cəlil Rüstəmov Talıbov dönəmində Naxçıvan Ali Məclisi Aparatının Hüquq şöbəsinin müdiri vəzifəsində işləyib.
“Naxçıvanda nə qədər anormal qanunlar var, bunun qələmindən çıxıb”, - deyə sakinlər bildirir. Üstəlik, o, Vasif Talıbov və müavini Azər Zeynalovun bütün çirkli işlərinin icraçısı və müəlliflərindən biri kimi tanınıb. İddia olunur ki, Naxçıvanda bir çox günahsız insanların həbsində də Cəlil Rüstəmovun əli olub.
“Rüşvətin və “paket”in kitabını bu yazıb, aylıq yığıma və onun bölüşdürülməsinə şəxsən nəzarət edib”, - deyən mənbənin sözlərinə görə, Naxçıvan sakinləri C.Rüstəmovun qanunsuz əməlləri nəticəsində illərlə zülm çəkib. İndi sakinlər haqlı olaraq sual edirlər ki, Cəlil Rüstəmov hansı xidmətlərinə görə Kəngərli Rayon icra başçısına müavin təyin olunub?!
