“Azərbaycan və Ermənistan yekun sülh müqaviləsi imzaladıqda, biz Ermənistanla münasibətləri normallaşdırmağa hazır olacağıq”.
Türkiyənin xarici işlər naziri Hakan Fidan belə deyib.
“Əgər münasibətləri hazırkı mərhələdə normallaşdırsaq, Ermənistanın Azərbaycanla sülh müqaviləsi imzalamasının əsas səbəbini aradan qaldıracağıq. Beləliklə, biz bölgədə dondurulmuş münaqişə ehtimalı ilə qarşılaşırıq. Biz isə bunu istəmirik”, - deyə Hakan Fidan əlavə edib.
Türkiyənin xarici işlər naziri vurğulayıb ki, Vaşinqton razılaşmalarında iki məsələ müzakirə olunmur: biri Zəngəzur dəhlizi məsələsi, digəri isə Ermənistan Konstitusiyası ilə bağlı bəzi məsələlərdir.
O qeyd edib ki, bu məsələlər həll edildikdən və yekun razılaşma imzalandıqdan sonra Türkiyə Ermənistanla sərhədlərini açacaq.
Hakan Fidanın açıqlaması Türkiyə-Ermənistan sərhədlərinin açılmasının mümkünlüyü ilə bağlı rəsmi İrəvanın son səylərinə cavab hesab oluna bilər. Daha doğrusu, Azərbaycan Prezidentinin Ermənistana yüklərin tranzitinə qoyulan qadağaları ləğv etməsindən sonra Baş nazir Nikol Paşinyan Türkiyə ilə sərhədlərin açılacağına hesablanmış müəyyən mesajlar verib.
Nikol Paşinyan Qazaxıstan taxılının Azərbaycan ərazisindən keçməklə Ermənistana göndərilməsinə cavab jesti edib. O, Türkiyə və Azərbaycan arasında yüklərin daşınması üçün Marqara-Yexiqnadzor (Keşişkənd) - Sisyan (Qarakilsə) - Gorus yolunu açmağa hazır olduğunu bildirib.
Əslində, Ermənistan hakimiyyətinin məqsədi Türkiyə ilə sərhəd-buraxılış məntəqələrini daha işlək vəziyyətə gətirmək və Azərbaycanla sülh müqaviləsi imzalanmadan sərhədlərin açılmasına nail olmaqdır.
Lakin Türkiyə tərəfindən səslənən son bəyanatlar Ankaranın Ermənistanın manipulyasiyaları qarşısında geri çəkilmədiyini və əvvəlki şərtlərin qüvvədə qaldığını göstərir. Ötən həftə Türkiyənin nəqliyyat və infrastruktur naziri Abdülkadır Halıkoğlu sərhədlərin Azərbaycanla Ermənistan arasında sülh prosesi başa çatdıqdan sonra açılacağını deyib.
Hakan Fidanın açıqlaması Türkiyənin sülh prosesi ilə bağlı şərtindən dönmədiyini təsdiq edir. Türkiyənin digər tələbi isə Ermənistan Konstitusiyasına dəyişikliyin edilməsi ilə bağlıdır. Çünki Konstitusiyanın dəyişilməsi yalnız Azərbaycana qarşı ərazi iddiasına son qoyulmasını nəzərdə tutmur.
Ermənistan Konstitusiyasının preambula hissəsində Müstəqillik Bəyannaməsinə istinad edilir. Bu sənədin 11-ci bəndində isə Türkiyənin altı vilayətinə ərazi iddilarını nəzərdə tutan “Qərbi Ermənistan” ifadəsi var.
Həmçinin qondarma erməni soyqırımının bütün dünyada tanıdılması məqsəd kimi qarşıya qoyulur. Eyni zamanda, Ermənistanın dövlət gerbində Ağrı dağının təsviri yer alıb.
Ankara Ermənistandan Türkiyəyə qarşı ərazi iddialarını və “soyqırım” məsələsini Konstitusiyadan çıxartmağı tələb edir. Əks təqdirdə, sərhədlərin açılması Ermənistan tərəfinin düşündüyü qədər asan olmayacaq.
“Cebheinfo.az”
