Konqo Respublikasının iki vətəndaşı Azərbaycana gələrkən Bakıda elə hava limanında saxlanılıb. Sənədləşmə işlərindən sonra da birbaşa Kürdəxanı qəsəbəsində yerləşən türməyə - Bakı İstintaq Təcridxanasına yerləşdirilib.

Bizimyol.info xəbər verir ki, 1988-ci il təvəllüdlü Hervi Musiteke Maquina və 2000-ci il təvəllüdlü Jumil saxta sənəddən istifadə etməkdə və Azərbaycanın dövlət sərhədini qanunsuz keçməkdə ittiham olunur. İttihama əsasən, onlar hava limanındakı sərhəd-buraxılış məntəqəsində yoxlama zamanı özlərini Belçika vətəndaşı kimi təqdim ediblər. Sərhəd Xidmətinin əməkdaşlarına da Belçika pasportları təqdim ediblər. Əməkdaşlar xüsusi cihazlarla yoxlama apararkən pasportların saxta olmasından şübhələnib. Bu səbəbdən də onların hər ikisi saxlanılıb.

Onlar ifadələrində bildiriblər ki, 3-4 ildir Türkiyədə yaşayır və orada işləyirlər. Amma Avropaya getmək istəyirlər, lakin viza ala bilmirlər. Türkiyədə tanıdığı bir nəfər onu sosial şəbəkə vasitəsilə Cerri adlı bir nəfərlə əlaqələndirib. Cerri Belçika pasportu düzəltmək məsələsində kömək edəcəyinə söz verib. Deyib ki, bu işi Türkiyədə yaşayan bir nəfər edəcək. Dediklərinə görə, onların bir-biri ilə tanışlığı da bu cür olub. Danışıblar ki, hava limanında görüşüb, İstanbul-Bakı reysi ilə Azərbaycana, buradan Dubaya, oradan da Avropaya getsinlər.

İstanbul aeroportunda saxta Belçika pasportunu əldə edən kimi əsl Konqo pasportunu cırıb, zibilliyə atıblar. Lakin Bakıda hava limanında onların sənədlərinin saxta olduğu üzə çıxıb və planlarını başa çatdıra bilməyiblər.

Adları çəkilən Konqo vətəndaşlarının hər biri məhkəmənin hökmü ilə 1 il 3 ay azadlıqdan məhrum edilib. Hökmə əsasən, onların cəza müddəti başa çatandan dərhal sonra hər ikisi Azərbaycandan deportasiya ediləcək.