Dünən bir neçə nəfər ərəb mənşəli turistin Şəhidlər Xiyabanında qəbirlərə qarşı təhqiramiz hərəkətləri ölkə gündəmini çalxalandırdı.
Yenicag.az xəbər verir ki, həmin şəxslər saxlanılaraq barələrində 3 ay həbs-qətimkan tədbiri seçildi.
Həmin görüntülərdə ərəb turistlər tərəfindən təhqiramiz hərəkətlər edilən şəhid Hüseynov İlham Bəhrəm oğlunun qardaşı Hüseynov Ruhlan Bəhrəm oğlu saytımıza danışıb.
Qeyd edək ki, Hüseynov İlham Bəhrəm oğlu 1973-cü il dekabrın 9-da Gəncədə anadan olmuşdur. O, Gəncə şəhərinin hərbi hissəsinin əsgəri olub və o ailə vəziyyətinə görə döyüş bölgəsinə getməyə icazə verilməsə də, İlham özü könüllü olaraq komandirindən onu döyüşə göndərməsini xahiş edib. İlham könüllü olaraq müharibədə iştirak edərək vuruşub və öz döyüş yoldaşları mühasirədə olarkən onların azad olunmasında böyük səy göstərərək mühasirədən çıxarıb, geri qayıdarkən şəhid olub. O vaxt onu dəfn edəndə Daxili İşlər Nazirliyi, icra hakimiyyəti şəhidi Gəncədə dəfn etməyə imkan verməyərək onu Şəhidlər Xiyabanında dəfn edib.
Şəhidin qardaşı hadisə barədə “Yeni Çağ”a danışıb:
“Şəhid Hüseynov İlhamın qardaşıyam. İlk növbədə, Azərbaycan Respublikasının Prezidenti, arxa dayağımız olan İlham Əliyev cənablarına təşəkkür edirəm. Mən dünən bu hadisəni televiziyada görəndən sonra hələ də özümə gələ bilməmişəm. Dağ boyda qardaşı torpağa şəhid verdim ki, hansısa şərəfsiz gəlib onun məzarı başında oynayıb rəqs eləsin. Bu bağışlanılmaz hərəkətdir. O videonu görəndən şəkərim, təzyiqim düşmür, ürək ağrısından dura bilmirəm. Bu hadisə ilə mənə çox ağır dağ çəkildi. Bu çox dözülməz dərddir. O hadisədən sonra rəsmən çökmüşəm, normal danışa bilmirəm artıq. Bundan o tərəfə deyəcək sözüm yoxdur. Mənim tək istəyim odur ki, qardaşımı təhqir edən bu şəxslərin məhkəmələrində iştirak edim. Bu şəhidlər hamımızın şəhidləridir. Biz onların şəhid qanlarının hesabına yaşayan xalqıq. Onların məhkəmələrində şəhid qardaşı kimi iştirak etmək və onlara öz ürək sözlərimi çaldırmaq istəyirəm”.
Şəhid qardaşı həmçinin həmin şəxsləri hadisə yerində müşahidə edən turizm şirkətinə də etirazını bildirib və həmin şirkəti məhkəməyə verəcəyini qeyd edib:
“Mən, əsasən, onları Azərbaycana gətirən turizm şirkətindən şikayətçi olacağam. Öz şəxsi ərizəmlə onları məhkəməyə verəcəyəm. Necə olur ki, başqa bir ölkənin vətəndaşı gəlib bizim qürurumuz olan şəhidləri təhqir edib oyun çıxardır və bu turizm şirkətinin əməkdaşı ona şillə vura bilmir ki, siz burada belə şeyi edə bilməzsiniz. Hazırda Gəncə şəhərindən də, rayonlardan zəng edib bu hadisəyə görə mənə təsəlli verirlər. Azərbaycan Respublikasının Prezidenti və daxili işlər nazirinə öz təşəkkürümü bildirirəm”.
