"PKK-nın yox olacağı haqda fərqli fikirlər var. Qənaətimcə, PKK yalnız formasını dəyişəcək. PKK, PYD, YPG və PEJAK tamamilə ortadan qaldırılsa və yalnız SDK qalsa belə, bu mahiyyətdən imtina olmayacaq. Çünki qanuniləşənlərin canlı gücü, maliyyəsi, silahı qalana, yəni qanuniləşdirilməyənə keçəcək. Buna görə də Türkiyə gecikməməlidir".

Reyting.az xəbər verir ki, bunu professor Xaləddin İbrahimli Türkiyədə kürd terror qruplaşması PKK-nın təslim olmasını şərh edərkən deyib.

X. İbrahimli bildirib ki, ABŞ, İsrail və İran Suriyanın şimalında kürdlər üçün dövlət qurmağa çalışır və bu plandan əl çəkmirlər: “Onlar Suriyada da İraqda ediləni təkrarlamaq istəyirlər: kukla Druz dövləti; Şimali Suriya Kürd Dövləti, Dəməşq Suriya Dövləti.

Sonra nə olacaq? Cavab hələ çox sadədir. İsrail, ABŞ və İranın bölgədəki müttəfiqləri artacaq və Türkiyə Cümhuriyyəti daxilində xaos yaradıb, Şərqdə 3-cü Kürd dövlətini quracaqlar. Bununla da Türkiyənin Yaxın Şərqlə quru münasibətləri pozulacaq”.

Professor əlavə edib ki, indi ABŞ Türkiyənin başını qatmağa çalışır, İsrail hədələyir, İran isə arxada öz işini görür.