Qusar rayonu, Kuzunqışlaq kənd sakini Qəribova Gita Ulubəy qızı tərəfindən Hurriyyet.az saytının redaksiyasına növbəti şikayət məktubu daxil olub. Şikayətçi saytımız vasitəsilə Prezident İlham Əliyevə və Birinci vitse-prezident Mehriban Əliyevaya müraciət ünvanlayıb. Müraciəti olduğu kimi dərc edirik:

“Cənab Prezident!

Yazıb bildirmək istəyirəm ki, ünvanlı sosial yardım üçün aidiyyəti quruma müraciət etmişdim. Mənə cəmi 2 ay ünvanlı sosial yardım verildi, sonra isə müavinətim kəsildi.

Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondundan mənə qane edilməyən cavab verildi. Qurumun cavabını olduğu kimi qeyd edirəm:

“Qusar rayon sakini Qəribova Gita Ulubəy qızının ünvanlı sosial yardımla bağlı elektron sistemə sonuncu müraciətinə əsasən ailəyə 1 avqust 2024-cü il tarixindən 532.55 məbləğində ünvanlı sosial yardım təyin olunub. Ailənin sosial yardım almaq hüququna yenidən baxılarkən müəyyən edilib ki, Qəribova Gita Ulubəy qızının məşğulluğu torpaq pay mülkiyyəti ilə təmin edilsə də, sahibkarlıq fəaliyyəti üzrə gəlirlərinə dair “ərizə-bəyannamə”də qeyd olunmuş məlumatların təsdiqini tapmadığı aşkar edildiyinə görə ailəyə təyin edilmiş sosial yardım 29.10.2024-cü il tarixində dayandırılıb”.

Qeyd edim ki, mən və bacılarım eyni vaxtda nazirliyə müraciət etmişdik. Mənə qaranlıq qalan odur ki, eyni sənədlərlə digər bacılarım müavinət alır, mən isə ala bilmirəm. Bununla bağlı nə edəcəyimi də mənə demirlər.

Xahiş edirəm, məsələ ilə bağlı tapşırıq verəsiniz”.