Bakı şəhəri Nəsimi rayonu İzzət Həmidov küçəsində yaşayan Damed Ağayev "Aslan MTK" tikinti şirkətindən şikayətçidir. "DİA-AZ" xəbər verir ki, narazı vətəndaşın iddiasına görə, sözügedən şirkətin rəhbəri Fərhad Abbasov Azərbaycan Respublikası Cinayət Məcəlləsinin 178 (dələduzluq), 213 (vergidən yayınma), 308 (vəzifə səlahiyyətlərindən sui-istifadə), 311 (rüşvət alma) və 125 (özünü öldürmə həddinə çatdırma) maddələri ilə təqsirli bilinərək, barəsində cinayət işi açılıb.

Ağayev bildirir ki, Fərhad və Rafiq Abbasov qardaşlarının şirkətləri ilə bağlı 7 ildir müvafiq dövlət orqanlarına çoxsaylı şikayətlər etsə də, heç bir nəticəsi olmayıb. Onun sözlərinə görə, “Aslan MTK”da fəaliyyət göstərən bir sıra şəxslər qanunsuz əməllərlə məşğuldur. Ağayevin iddiasına əsasən, o şirkətin qanunsuz fəaliyyəti ilə bağlı prokurorluğa müraciət etdikdən sonra şirkətin müdir müavini Gülnar Rəsulova onun mənzilində işıq və suyu kəsdirib.

Vətəndaş uzun illərdir mənəvi və psixoloji təzyiqlərə məruz qaldığını deyir.

Şikayətçi iddia edir ki, MTK-nın inşa etdiyi binalar hazırda yararsız vəziyyətdədir və sakinlərin həyatı təhlükə altındadır. Binanın fasadı yoxdur, liftlər işlək vəziyyətdə deyil, su və işıq xətləri isə tikinti normativlərinə uyğun deyil. Bununla bağlı Fövqəladə Hallar Nazirliyinin əməkdaşları ərazidə baxış keçirib və binaların həqiqətən də yaşayış üçün yararlı olmadığını təsdiqləyiblər.

Lakin bütün bunlara baxmayaraq, binalar rəsmi sənədlərdə yaşayış üçün yararlı kimi təqdim olunub. Vətəndaş iddia edir ki, “Aslan MTK”nın arxasında keçmiş yüksək vəzifəli şəxslər, Fuad Ələsgərov və Ramiz Mehdiyev dayanır, elə ona görə də MTK öz qanunsuzluqlarına davam edir. O, adiyyatı qurumlara müraciət edərək, bu məsələnin araşdırılaraq qanuni qiymət verilməsini xahiş edir.