Son günlər mediada yayılan məlumatlara görə, Ermənistan fəal şəkildə Azərbaycanla müharibəyə hazırlaşır. Bunun planlı və məqsədyönlü olduğu qeyd edilir. Fransanın Ermənistana veriləcək 26 ədəd “Bastion” zirehli transportyorundan 10 ədədinin istehsalının başa çatdırıldığı, Ermənistana göndəriləcəyi, eləcə də Parisin artıq 12 ədəd “SEZAR” artilleriya qurğusunu İrəvana ötürdüyü və ilin sonunadək daha 24 belə silahın Ermənistana veriləcəyi diqqətə çatdırılıb.
Sözügedən proseslər nədən xəbər verir?

Globalinfo.az-a danışan hərbi ekspert Səxavət Məmməd xatırladıb ki, Ermənistan və Azərbaycan hərbi büdcəni 2 dəfə artırıblar:

“Bu amil ondan xəbər verir ki, regionda gərginlik var, müharibə ehtimalı da yüksəkdir. Ermənistan şərti sərhəd boyu dərinləşdirilmiş mühəndis-istehkam işləri görür, bunkerlər tikir. Qarabağdakı bunkerlərlə bunlar arasında müəyyən fərqlər var. Şərti sərhəddə tikilən bunkerlər arasında birbaşa əlaqələr mövcuddur. Bunkerlərin dağıdılması və sıradan çıxarılması asan deyil. Apardığım araşdırmalara görə, sözügedən bunkerlər tam standartlara uyğun tikilib və fransız mütəxəssisləri bunun üzərində işləyib.

Ermənistana verilən “Bastion”lar səhra maşınlarıdır, daha çox Afrikada istifadə olunub. Ermənistan dağlıq əraziyə malikdir. Bu silahların orada müsbət effekt verəcəyi gözlənilmir. “SEZAR” haubitsaları isə nəslinin ən yaxşısıdır. Ermənistanın bu texnikaları əldə etməsi son dərəcə təhlükəlidir. Onlar Azərbaycanın dərinliklərini hədəf ala bilərlər”.

Hərbi ekspertin sözlərinə görə, Azərbaycan da adekvat olaraq ordusunu gücləndirir:

“Azərbaycan aviaparkını tamamilə yenilədi. “JF-17” qırıcıları aldı, hansı ki, bunlar müasir döyüş təyyarələri hesab olunur. Çexiyadan alınan DITA haubitsiaları da müasir və kifayət qədər yaxşıdır.

Ermənistan hərbi büdcəsini artırdıqdan sonra iki xüsusi təyinatlı hərbi hissə yaratdı. Bu hərbi hissələrdən biri də Zəngəzur dəhlizinin keçəcəyi istiqamətdə müəyyən olunan dislokasiya hissəsində yerləşdirildilər. Ermənistanın ABŞ-la münasibətləri, strateji müttəfiqlik xartiyasının imzalanması və s. göstərir ki, rəsmi İrəvan hazırlıq içərisindədir. Qarabağ klanı sayılan şəxslər də açıq şəkildə müharibə ritorikasından çıxışlar etməyə başlayıblar. Bildirirlər ki, Qarabağı və Qərbi Zəngəzuru da götürə bilərlər”.

Siyasi şərhçi Kənan Novruzov isə məsələyə belə münasibət bildirib:

“Regionla bağlı çox təhlükəli oyunlar oynanılır. Ermənistanın silahlandırılması da bu oyunların bir hissəsidir. Hər dövlətin silahlanmaq hüququ var. Lakin təcrübə göstərir ki, xarici ölkələrin Ermənistanı silahlandırmasında müəyyən maraqlar var. Rəsmi İrəvana ölümcül silahlar verilir. Ermənistanın Azərbaycanla bağlı mövqeyi adekvat və ədalətli deyil. Bütün bunların fonunda demək olar ki, Ermənistana verilən silahlar müdafiə məqsədli deyil. Müəyyən planlara xidmət edir”.

K.Novruzov qeyd edib ki, bu prosesin sonunda regionda yeni gərginliyin, toqquşmanın başlanması gözləniləndir:

“Ermənistanda özünəinam yaratmaqla sülh gündəliyindən uzaqlaşdırırlar. Ümumi proseslər Ermənistanın Ukraynanın taleyini yaşayacağını, yəni müəyyən gərginlik fonunda Qərbdən asılı vəziyyətə düşəcəyini gözləyirlər. Belə olduğu halda Qərb, Fransa Ermənistan vasitəsilə Cənubi Qafqaza müdaxilə edə biləcəklər”.