Bir müddət öncə Avrasiya.net “KQB”nin nin III bölməsinin rəisi olan, 1990-cı ildə dünyasını dəyişən mərhum polkovnik Rövşən Heydərovun qızı hüquq müdafiəşisi Səyarə Heydərovanın özünə məxsus bütün daşınan və daşınmaz əmlakını Rusiya prezidenti Vladimir Putinə vəsiyyət etdiyini yazmışdı.
Xatırladaq ki, vəsiyyətnamədə S.Heydərova özünə məxsus Bakı şəhəri, X.Məmmədov küçəsi, ev 21, 27 saylı mənzili 7 oktyabr 1952-ci ildə doğulmuş Rusiya Federasiyası vətəndaşı Putin Vladimir Vladimiroviçə vəsiyyət etdiyini yazıb. Vəsiyyətnamə Bakı şəhəri 2 saylı “ASAN” xidmət mərkəzinin notariusu H.H.Məmmədov tərəfindən, reystrdə 2 v 349 nömrə ilə qeyd edilib.
O vaxtı məlumatı dəqiqləşdirmək məqsədilə S.Heydərovanın özü ilə əlaqə saxlaya bilmədik.
Xatırladaq ki, S.Heydərova Gülər Əhmədova olayı ilə bağlı gündəmi zəbt edənlərdən biri olub. Belə ki o, sabiq millət vəkili Gülər Əhmədovaya kömək məqsədilə Elşad Abdullayevin yaydığı videoların saxta olub, olmadığını aydınlaşdırmaqdan ötrü “Foreneks” MMC-yə müraciət edib. Bundan başqa Fransada məskunlaşan MTN-nin xüsusi işlər üzrə keçmiş müstəntiqi, polkovnik Ramin Nağıyev və ABU-nun sabiq rektoru Elşad Abdullayevlə aralarındakı yazışmanı da ilk dəfə mətbuata ötürüb.
Avrasiya.net S.Heydərovanın İranda səfərdən yenicə qayıtdığı xəbərini aldıqdan sonra onunla həmsöhbət olduq.
- Səyarə xanım, əmlakınızın Putinə vəsiyyət etməsi xəbərini eşitdik. Bu düzdürmü və vəsiyyətin ona etməyinizin səbəbləri nədir?
- Düzdür, mən bütün əmlakımı Putinə vəsiyyət etmişəm, bəs kimə etməliydim ki? Bakı şəhəri, 2 saylı ASAN xidmətə gedib bu vəsiyyətnaməni yazmışam. Ona görə evimi Putinə vəsiyyət etdim ki, mənə rahatlıq verməyənlər sussunlar. Neçə aydır ki, sahə müvəkkili İsmayıl Şahbazov məni rahat buraxmır. Hər gün onun təzyiqləri ilə üzləşirəm. Onun əsas məqsədi mənə müxtəlif vasitələrlə təzyiq etməklə evimi əlimdən almaqdır. Bununla bağlı neçə dəfə şikayət etmişəm, amma bir ölçü götürməyiblər. Mirqafar Seyidovun yanında olmuşam, Vilayət Eyvazova yazmışam, amma heç bir faydası olmayıb. Şikayətimə baxan olmayıb. Məcbur olub əmlakımı Putinə vəsiyyət etdim. İndi gedib ondan mənzilimi özləri üçün tələb etsinlər. Ayın 22-də sahə müvəkkili mənə təzyiq edib, üstümə hücum çəkib. Videonu sizə göndərmişəm. (VIDREC0030A.avi)İsmayıl Şahbazov məni ölümlə hədələyib, plan qurub, amma buna heç kəs diqqət yetirməyib. O və Sabunçu rayon prokuroru məni dəlixanaya salmaq istəyiblər. Amma bu onlara qismət olmayıb. Ona görə ki, əlimdə psixi xəstəxanada qeydiyyatda olmadığım haqqında sənəd var. Bunu biləndən sonra sahə müvəkkili məni şantaj etməyə başladı, amma bilmədi ki, kimə sataşır.
- Eşitdik ki, İrana getmişdiz. Səfərinizin məqsədi nəydi?
- Hə getmişdim. Bir, iki gün olar qayıtmışam oradan. Atamın (R.Heydərov xidməti vəzifəsini yerinə yetirdiyinə görə İranda iki dəfə həbs olunub – red.) sənədlərinin dalınca getmişdim. Əmlak Komitəsinin sədri Kərəm Həsənov atama məxsus Şəkidəki evin sənədləri saxtalaşdırıb. Qanunları pozur, atamın mülkünü mənə verməkdən imtina edir. Eşitdim ki, digər sənədlərlə yanaşı atama məxsus Şəkidəki evin sənədləri də İrandadır. Ona görə İranda oldum. Anam o evi arzulayıb, o, rəhmətə gedib, amma arzusunu yerinə yetirmək istəyirəm, qanunla o ev mənə düşür. Kərəm Həsənov isə sənədləri vermir. Mənim bu məsələ ilə bağlı müraciətim Xarici İşlər Nazirliyi və konsulluq şöbəsi İrana yollayıb. Bir qədər gözləmək lazımdır. Mən saxta sənədlər düzəltdiyinə görə Kərəm Həsənovun həbsinə nail olacam. Saxta sənədlərə görə 2 atam olub, biri 1946-cı ildə, o biri isə 1968-ci ildə ölüb. Nənəm də 2 dəfə doğulub, 1913 və 1916-cı illərdə. Şəkidəki evimizin sahəsi də böyüdülüb, kiçildilib. Əvvəlcə 78 kv.m idisə, sonradan 29 kv.m olub. Bütün bunlar Kərəm Həsənovun oyunlarıdır.
- Sizi İranda necə qarşıladılar?
- Çox yaxşı, şox yüksək səviyyədə. Rahat və maneəsiz gedib gəldim. Heç kim mənə toxunmadı, incitmədi, əksinə yüksək nəvazişlə məni qəbul edib, yola saldılar.
- İrana getməkdən qorxmurduz ki? Axı bir hüquq müdafiəşisinin İrana səfəri bir az qorxulu ola bilərdi…
- Düzdür, mən ölümə gedirdim, düşünürdüm ki, məni orada həbs edəcəklər. Amma mən hər şeyə hazır idim, təki sənədləri əldə edim. Mən öz ayağımla ETTELAAT-a getdim və atamın sənədlərini tələb etdim. Mənə Təbrizə getmək məsləhət bilindi. Amma mən müəyyən səbəblər üzündən ora gedə bilmədiyimi dedim və bir neçə günə sənədlərimlə bağlı müəyyən orqanlara sorğu göndəriləcəyini bildirdilər.
- Xatırlayırsızsa, orada bir neçə fəalımızı həbs etmişdilər. Bu həbs təhlükəsi sizin ücün də ola bilərdi….
- Əlbəttə, İrana gedən hər kəs o ölkənin qanunlarına hörmət etməlidir. Orada bilirlər kimi həbs etmək lazımdır. Yeri gəlmişkən, məni Bakıda 18 dəfə həbs ediblər. Hətta deputatlığa namizəd ola-ola polisin rüşvət aldığı anı lentə köçürərkən məni həbs etmişdilər. İranda isə yersiz və səbəbsiz olaraq heç kimi həbs etmirlər. Onların qanunlarına hörmət olunmalıdır, şəxsən mən orada baş örtüyündən istifadə etdim və özümü də normal apardım. Kim ki deyir İran təhlükıli ölkədir, yalandır. İranda hər bir vətəndaşa hörmətlə yanaşırlar. Mən orada yüksək nizam-intizam gördüm, əhali sərbəst və rahat, bolluq işində yaşayır, Çox ucuzluqdur. Hətta deyərdim ki, İran inkişaf etmiş Avropa dövlətlərini geridə qoyub. İnanıram ki, bu Ramazan ayında İran dövləti mənə atamən sənədlərini verəcək və mən də Kərəm Həsənov kimiləri ifşa edəcəm.
