İlon Maskın “SpaceX” şirkəti minlərlə Starlink peyki ilə Yer orbitini doldurarkən kosmik tullantı böhranı sürətlə dərinləşir.

Lent.az xəbər verir ki, hazırda hər gün 1–2 Starlink peykinin Yerə düşdüyü açıqlanıb.

2019-cu ildən bəri 8 mindən çox peyk buraxılıb, təkcə 2025-ci ildə bu rəqəmə 2 mindən artıq əlavə olunub. Amazon və Çin də minlərlə peyk buraxmağı planlaşdırır.

Mütəxəssislər peyklərin ömrünün orta hesabla 5 il olduğunu, idarəli şəkildə Yerə yönləndirilsə də, parçalanma zamanı yaranan metal və kimyəvi maddələrin atmosferi çirkləndirə biləcəyini bildirir.

ABŞ Federal Aviasiya İdarəsinin (FAA) hesabatına görə, 2035-ci ildən etibarən hər il 28 min peyk qalıqları atmosferə daxil ola bilər. Bu isə insanların kosmik tullantı səbəbindən həyatını itirmə riskini 61%-ə qədər artırır.

Alimlərin ən böyük qorxusu isə “Kessler sindromu”dur – yəni orbitdə zəncirvari toqquşmaların insanlığın kosmosa çıxışını onillərlə, hətta əsrlərlə mümkünsüz etməsi ehtimalı.

Üstəlik, güclü günəş fırtınaları bir anda yüzlərlə peyki sıradan çıxara bilər. Mütəxəssislər xəbərdarlıq edir: “Artıq kosmik tullantılar problemini görməzlikdən gəlmək mümkün deyil.”